BBC-ийн сэтгүүлчид 24 цаг ажил хаяна

Нэгдсэн вант улсын BBC мэдээллийн том корпорацийн сэтгүүлчид ажлын байрны цомхотголыг эсэргүүцэн ажил хаялт зарлалаа. Орон нутгийн цагаар 00:00 цагаас эхлэн Сэтгүүлчдийн үндэсний холбоонд \СҮХ\ нэгддэг бүх сэтгүүлчид нэг хоногийн хугацаатай ажил үүргээ гүйцэтгэхээ зогсоох аж.

“Мэргэжлийн сэтгүүлчдийнхээ ажлын байрыг хамгаалахын тулд BBC дэх СҮХ-ийн гишүүд ажил хаях хэрэгтэй болсон” хэмээн энэхүү байгууллагын тэргүүн Мишель Станистрит өгүүллээ.” Сүүлийн үед удирдлагын зүгээс гаргаж байгаа ухаалаг бус шийдвэрүүдэд медиа корпорацийн ажилтнууд сэтгэл дундуур байгаа. Тэдний явуулж буй буруу бодлогын уршгаар жинхэнэ мэргэжилтнүүд өөрийн дур сонирхолтой ажлаасаа хагацан, BBC-гийн мэдээллийн чанар үндсэндээ алдагдана” гэж тэрээр нэмэн ярьсан байна.

Одоогийн байдлаар BBC-д нийт 17,8 мянган хүн ажилладаг ба ажилтнуудын жилийн дундаж цалин 38 мянган фунт буюу 60 мянган доллар байдаг нь тус орны дундаж түвшнээс дээгүүрт ордог юм байна. Мөн тус байгууллагын хамгийн чадалтай, өндөр цалинтай 40 орчим сэтгүүлч жилдээ 200 мянган     фунт буюу 313 мянган доллар авдаг аж.

Д.Мигаа