Австралид их хэмжээний хар тамхи хураагдав

Австралийн Холбооны цагдаагийнхан 438 сая доллараар үнэлэгдэх метамфетамин хэмээх хүчтэй үйлчилгээтэй 585 кг хар тамхи хурааж авсан байна.

Холбооны цагдаагийн комиссар Тони Негус өгүүлснээр, уг хар тамхийг хураах ажиллагаа нь Австралид хамгийн томд тооцогдоно гэжээ. Энэхүү ажиллагаа нь өнгөрөгч оны есдүгээр сараас эхэлсэн аж.

Тухайн үед үл мэдэх хэн нэгэн хууль сахиулах байгууллага руу утасдан, Сиднейн баруун районд орших нэгэн агуулах сэжиг бүхий идэвхжиж байна хэмээн мэдээлжээ. Түүнээс хойш хэдэн сарын турш цагдаагийнхан уг агуулахыг нууцаар ажиглан, тийшээ сэжиг бүхий чингэлгүүд оруулж байгааг харсан аж. Ингээд хоёрдугаар сарын 22-нд тэд гэмт этгээдүүдийг хятадын өмнө зүгийн Шэньжень хотоос ирсэн ачааг хүлээн авах үед нь гардан баривчилжээ. Хар тамхийг цэвэрлэгч бодисын шуудай дотор нуусан байсан аж.

Ажиллагааны явцад цагдаа нар уг хэрэгт холбогдуулан сингапур, хонконг, австрали гурван сэжигтнийг баривчилсан байна. Тэдэнд бүх насаар нь хорих ял оноогдох магадлалтай ба Австрали болон хилийн чанадад уг хэрэгт холбоотой байж болох шинэ хүмүүсийг баривчлахыг үгүйсгэхгүй гэж Тони Негус хэлжээ.

Д.Мигаа