Азгүй оргодол шоронгийн хуягуудыг өөрөө дууджээ

Бразилийн Гойас мужийн шоронгоос нэгэн хоригдол зугатахыг оролджээ. Тэрбээр шоронгийн харгалзагч нарт мэдэгдэхгүйгээр ханыг нүхэлж чадсан бөгөөд хамгийн азгүй нь ханын цоорхойгоор багтахаа байж наашаа ч үгүй, цаашаа ч үгүй нам гацжээ. Бүхэл бүтэн 30 минутын турш "дөнгөнөөс" өөрийгөө салгахыг оролдсон тэрбээр арга бараад харгалзагч нарыг өөрөө дуудсан байна. Гэтэл шоронгийн хуягууд түүнийг загнаж зандрахын оронд тойрч зогсоод шоолон хөхрөлдөж наргиан болгосон аж. Ийнхүү өөрөө өөрийгөө барьж өгсөн "оргодол ялтан"-ыг нүхнээс нь гаргахын тулд хуягууд аврах ангийнханыг дуудан нүхийг нь үл ялиг томсгож байж "өөрийн хүнээ" гаргаж авчээ. Зугатахыг завсдан хоригдол эр нүхэнд цээжээ шургуулж үзсэн бөгөөд өгзөгнийхөө тойргийг нэмж тооцоогүй байсан нь ийн баригдахад хүргэжээ.