Дэлхий дахины үйл явдлын тойм
Автор
| Zindaa.mn
2013 оны 05 сарын 10
- Өнгөрсөн 7 хоногт Бангладешд 8 давхар барилга нуржээ. Энэ барилгад даавууны үйлдвэр үйл ажиллагаагаа явуулдаг байсан ба энэ нурангаас 600 гаруй хүний цогцсыг татаж гаргажээ.
- Малайзын Үндэсний Нэгдсэн эвсэл нь 56 жилийн туршид улс орныг удирдаж байгаа ба энэ удаа ч мөн сонгуульд олонхийн санал аван ялжээ.
- Испанийн Мадрид хотод болсон нислэгийн үзүүлэх тоглолтын үеэр хуучны жижиг тийрэлтэт онгоц сүйрчээ.
- Сири улс Израйлыг Сирийн засгийн газартай тулалдаж байгаа алан хядагч бүлгүүдэд цэргийн дэмжлэг үзүүлэх зорилгоор Дамаскус хотын ойролцоо агаарын дайралт хийсэн гэдгээр буруутгаж байна.
- Египетийн ерөнхий сайд Кишам Кандил түүний дагалдагч, бие хамгаалагч нар ням гарагийн өглөө Египетийн нийслэл Кайро хотод дайралтанд өртсөн боловч гэмтээгүй байна.
- АНУ болон Японы эх сурвалжийн мэдээлснээр Умард Солонгосын далайн зүүн эргийн Вонсан хотын ойролцоо байрлуулсан байсан дунд тусгалын баллистик пуужингаа буулгажээ.
- Япон, Хятадын архитекторууд Хятадын засгийн газарт барилга байгууламжийнхаа газар хөдлөлтийн хамгаалалтыг сайжруулах саналыг өргөн барилаа. Японы Олон Улсын хамтын ажиллагааны агентлаг 2008 онд Хятадын Сичуан мужид болсон 87 000 гаруй хүний амь насыг авч одсон газар хөдлөлтийн дараа Бээжинд хамтын ажиллагаагаа эхэлсэн юм.
- 5 сарын 4-5-нд шилжих шөнө 30 заан Энэтхэгийн зүүн хойд хотын ойролцоо орших тосгонд орж иржээ. Тосгоны оршин суугчдын хэлснээр бол тэд хоол эрэн 20 гаруй айл өрхийг хашаатай нь гишгэлж будаа болон ургацыг нь сүйтгэжээ.
- Япон, Өмнөд Солонгос улсуудын байгаль орчны сайд нар, Хятадын байгаль хамгаалах яамны дэд сайд Японы Китакуюшу хотод 2 өдөр хуралдаж даваа гарагт хамтарсан тунхаг бичгээ баталлаа.
- Гонконгийн дэлхийн хамгийн ачаалалтай усан боомтон дээр ажилладаг усан онгоцны засварын ажилчид 40 хоног жагссаны эцэст ажил хаялтаа зогсоолоо. 450 гаруй ажилчид цалингаа 20% хүртэл нэмэгдүүлэх шаардлага тавьж ажил хаялт хийсний үр дүнд 9,8%-аар нэмэгдүүлэхээр тохиролцжээ.
- Мягмар гарагт Филиппиний хамгийн идэвхтэй байдаг галт уул дэлбэрч их хэмжээний хад чулуу, үнс нурам цацсанаас болж 5 хүн амь алдсан байна. Эдгээр хүмүүс орон нутгийн цагаар өглөөний 8 цагт галт уул дэлбэрэх үед Манилагийн зүүн өмнөд хэсгээс 340 км-ийн зайтай орших Маяон ууланд авирч байжээ.
- Хятадад гараад байгаа H7N9 шувууны томууны тархалтыг Дэлхийн Эрүүл Мэндийн байгууллагатай хамтран судалж байгаа нян судлаачид энэ вирусыг фермээс зах хүрч, захаас фермрүү явж буй шувууны аж ахуй эрхлэгчид тарааж байж болзошгүй гэж үзэж байна.
- АНУ-ын хэвлэлийнхэн Хятадын засгийн газар болон цэргийн хүчин АНУ-ын засгийн газрын компьютеруудад кибер халдлага хийж байна гэж мэдээллээ. Хятад өөрийн хамгаалах программынхаа ачаар АНУ-ын дипломат алба, эдийн засаг, батлан хамгаалах салбарын нууц мэдээллийг цуглуулах тал дээр голчлон кибер халдлага хийж байна гэж албаны хүмүүс хэллээ.
- Италийн Генуя боомтод хөлөг онгоц хяналтын цамхаг мөргөснөөс болж 3 хүн амиа алдаж 6 хүн сураггүй алга болоод байна. Усан онгоц цамхагийг мөргөх үед 10 гаруй хүн цамхаг дээр байсан байна. Ослын үеэр 4 хүнийг эмнэлэгт хүргэж бусад нь алга болсон тул цамхагийн ойролцоо эрэл хайгуул хийгдэж байна.
- Хятадын банк Умард Солонгосын төрийн мэдлийн гадаад валютын гүйлгээ хийдэг банктай хийх гүйлгээгээ зогсоож данснуудыг хаалаа.
- НҮБ -аас Умард Солонгос улсад хүний эрхийн шалгалт хийлгэхээр 3 гишүүнийг томиллоо. НҮБ-ын шүүгч Майкл Кайрби удирдан илтгэгч Марцуки Дарусман, хүний эрхийн төлөө тэмцэгч Сония Бисерко нартай хамтран ажиллах юм байна.
- Брюселлийн нисэх онгоцны буудалд өнгөрсөн 2-р сард алмааз эрдэнийн хулгайн хэргээр 30 гаруй хүнийг баривчилсан ба зарим хулгайлагдсан алмааз эрдэнийг олж илрүүлээд байгаа гэнэ.
- Өнгөрсөн лхагва гарагт Өмнөд Солонгосын Сөүл хотод Солонгосын хойгийн хурцадмал байдлаас шалтгаалсан алан хядах ажиллагааны эсрэг томоохон сургуулилт болж өнгөрлөө. Өмнөд Солонгосын засгийн газар, цэрэг, армийн нийт 8000 гаруй хүн энэ сургуулилтад оролцжээ.
- ОХУ-ын Риановости агентлагийн мэдээлснээр 5 сарын 9-ны ялалтын баярт 160 000 гаруй цагдаагийн офицер, 13000 гаруй цэргийн албан хаагчид оролцсон байна. Дэлхийн II дайнд Зөвлөлт Холбоот Улс нацистын Германыг ялсны ойн баярын өдөр буюу 5-р сарын 9-ныг ялалтын баяр хэмээн тэмдэглэдэг билээ. Энэ жил ОХУ-ын 4000 гаруй хот тосгонд 24 цэргийн парад, 8500 гаруй баярын арга хэмжээ болж 10 сая гаруй хүн оролцов.
- Умард Солонгосын удирдагч Ким Чон Уны машин замын осолд ороход удирдагчийг ослоос аварсан хэмээн замын цагдаагийн ажилтан эмэгтэй тус улсын хамгийн дээд шагналаар шагнагджээ.
- Өнгөрсөн пүрэв гарагт Их Британийн ханхүү Харри АНУ-д хийх 7 хоногийн аялалаа Цагаан ордноос эхэлж тэргүүн хадагтай Мишел Обаматай уулзаж түүнийг харахаар цугласан залуу эмэгтэйчүүдтэй мэндчиллээ.
Сэтгэгдэл ( 0 )