Цаа бугын аж ахуйг сэргээж, цаачдын амьдралын түвшинг сайжруулна

Засгийн газрын 2007 онд баталсан “Цаа бугын аж ахуйг сэргээх, цаачдын амьдралын түвшинг сайжруулах хөтөлбөр”-ийн хэрэгжилтийг эрчимжүүлэх арга хэмжээний төлөвлөгөөг баталж, уг хөтөлбөрийг улсын хэмжээнд зохицуулах Үндэсний зөвлөлийн бүрэлдэхүүнийг шинэчлэн байгууллаа. Үндэсний зөвлөл нь ажлын явц, үр дүнгээ жил бүрийн 12 дугаар сард Монгол Улсын Ерөнхийлөгчид танилцуулан, олон нийтэд мэдээлж байхаар тогтжээ.

Цаатан иргэдийн амьдралын нөхцлийг сайжруулах зорилгоор 2013 оны 6 дугаар сарын 1-ний өдрөөс эхлэн тайгад амьдардаг 18 хүртэлх насны цаатан хүүхдэд Хангайн бүсийн амьжиргааны доод түвшингийн 50 хувьтай тэнцэх хэмжээний, насанд хүрсэн иргэнд амьжиргааны доод түвшингийн хэмжээгээр сар бүр мөнгөн тэтгэмж олгох ажлыг зохион байгуулах журмыг баталж, хэрэгжүүлэхийг Хүн амын хөгжил, нийгмийн хамгааллын сайд С.Эрдэнэд үүрэг болголоо. Мөн алслагдсан нутагт амьдарч байгаа цаатан иргэдэд төрийн үйлчилгээг шуурхай хүргэх ажлыг зохион байгуулж ажиллахыг Хөвсгөл аймгийн Засаг дарга Л.Ганболдод даалгасан байна.