Цацрагт хордогсдыг насан туршид нь харж хандахаар боллоо

Олон улсын цөмийн ослын зэрэг хуваарилалтын дагуу Фукушимагийн 1-р цөмийн цахилгаан станцын ослын зэрэглэлийг хамгийн дээд зэрэглэл болох 7-р зэрэглэлийн ослоор үнэлснийг Япон улсын Эдийн засаг аж үйлдвэрийн яамны цөмийн эрчим хүчний аюулгүйн байдлын хүрээлэн болон Японы цөмийн эрчим хүчний аюулгүйн байдлын зөвлөлөөс хамтран хийсэн албан ёсны мэдээлэл баталгаажуулж байсан. Тэрчлэн Фукушима-1 станцын ослын үеэр ажиллаж байсан 2 мянга орчим хүн эрүүл мэндэд аюултай 100 гаруй миллизивертерын цацрагийн хордолт авсан тухай мэдээллийн араас тус станцыг хариуцагч  “Токио электрик пауэр” компанийн зүгээс мэдэгдэл гаргалаа. Мэдэгдэлд тус компани цацрагт хордсон өөрийн ажилтануудын эмнэлгийн үзлэгийг насан туршид нь хангана гэдгээ албан ёсоор илэрхийлжээ.

Эргэн сануулахад, 2011 оны 3 дугаар сард японы “Фукушима-1” АЦС-ын гурван тогооны түлшний гол хайлсан юм. Үүний улмаас их хэмжээний нутаг дэвсгэр цацрагийн бохирдолтод нэрвэгдсэн. Одоогийн байдлаар асуудалтай эрчмийн блокуудыг хүйтэн байдалд оруулж, цөмийн түлшийг гаргаж авах бэлтгэл ажлыг хийж байгаа аж.

 Фукушимагийн 1-р цөмийн цахилгаан станцын цацраг идэвхт бодис алдагдсан хэмжээний хувьд Японы Цөмийн эрчим хүчний аюулгүйн байдлын хүрээлэнгээс 370 мянган триллион беккерелийг давсан гэж зарласан бол Японы цөмийн эрчим хүчний аюулгүйн байдлын зөвлөлийн тооцоолсноор 630 мянган триллион беккерель хүрсэн гэж үзэж байсан. Уг хоёр тоо бүртгэлийн зөрүү их байгаа ч цөмийн цахилгаан станцын ослын 7-р зэрэглэлийн стандартаас ихээхэн давсан гэж үзсэн байгаа.

 Түүхэн дэхь хамгийн ноцтой цөмийн осол гэгддэг ОХУ-ын Чернобылын цөмийн цахилгаан станцын ослыг 7-р зэрэглэлийн ослоор үнэлж байсан билээ.