Израйль улс Палестины 52 хоригдлыг суллажээ

Израйлийн Ерөнхий сайд Бинья­мин Нетаньяху, Барилга, хот байгуулалтын сайдтайгаа хамтран Йордан голын баруун эрэгт  20 мянга гаруй орон сууцыг барихаар төлөвлөж буй талаар урьд нь мэдэг­дэж байсан билээ. Эл хэргээс үүдэн тус улсын Палестинтай хийсэн хэлэлцээ нурахад хүрээд байсан юм. Тэгвэл Ерөнхий сайд энэхүү төлөв­лө­гөөгөө дахин бодолцож, өөр­чилж магадгүй байна. Энэ талаар Израйлийн Барилга, хот байгуулал­тын сайд Ури Ариэл өнгөрсөн мягмар гаригт мэдэгдэл хийлээ.  Тэрбээр "Бид Йорданы баруун эрэг дэх барилгажилтын ажлаа дахин авч хэлэцэх болно. Энэ бол Ерөн­хий сайдын хүсэлт юм" хэмээн мэдэгджээ. Израйль улсыг Йор­да­ны баруун эрэг болоод Йерусла­мын зүүн хэсэгт барилга барих гэж байна хэмээн Палестины тал өмнө нь НҮБ-д мэдээлж, хэрэв тус газар барилга баривал бид хэлэлцээгээ цуцлах болно гэдгээ мэдэгдэж байсан билээ. Харин АНУ Йорда­ны баруун эрэгт барилгажилтын ажлыг эхлүүлэх нь ихээхэн эрсдэл учруулж болзошгүйг Израйлийн талд  сануулж байсан юм. Б.Нета­ньяху ч холбоотон орныхоо зөвлө­гөөг дагасан ажээ. Тэрбээр төлөв­лө­гөөнөөсөө буцсанаар Палестин­тай илүү найрсаг харилцаа үүсгэ­хэд томоохон түлхэц болохыг ажиг­лаг­чид хэлж байна. Өнгөрсөн наймдугаар сард байгуулсан энхийн хэлэлцээрийн хүрээнд  Израйль улс Палестины 52 хоригд­лыг суллаад байгаа билээ. 

Хоёр улс газар нутгийн маргал­дааны улмаас өнөөг хүртэл зөр­чил­­дөөнтэй байгаа юм. Израйль улс 1967 онд тус бүс нутгийг хүчээр эзлэн авсан ч, Палестины 500 мянга гаруй еврей иргэн Йор­да­ны баруун эрэгт оршин суусаар байна.