Монголын боксчин залуу Англид мэргэжлийн боксын клуб нээсэн байна

Английн Манчестер хотын томоохон дүүрэг болох Стокпортод 49.1- 50.8 кг-ын жингийн аварга боксчин С.Шинэбаяр мэргэжлийн боксын клубээ нээжээ. Тэрбээр саяхан лицензээ авч, дасгалжуулагч хийх эрхтэй болсон байна. Монголын 1980-аад оны боксчин, тулааны спортын нэртэй шүүгч Сүхбаатарын хүү Шинэбаяр 26 жил боксчин байхдаа сурч мэдсэн зүйлээ дараагийн залуу үед өвлүүлэхээр шийджээ. Энэхүү боксын клубт зөвхөн тамирчид бус илүүдэл жингээ хасах хүсэлтэй хэн бүхэн ирж дасгал сургуулилтад хамрагдах боломжтой ажээ. Учир нь тус клубт энэ чиглэлийн дасгалжуулагч эмэгтэй Сара Стемп ажиллах юм. Стокпортын хөлбөмбөгийн баг тус клуб дээр ирж, хоёр долоо хоногт нэг удаа дасгал сургуулилт хийхээр болсон байна. Түүний үүсгэн байгуулсан клубийг дэмжиж сурталчлах зорилгоор Их Британи болон Европын 59.01-61.2 кг жингийн аварга Жонн Мури, Дэлхийн боксын нийгэмлэгийн 52.3- 53.5 кг жингийн аварга Скот Кувиг нар иржээ.