Мандэлаг үдэх ёслол дээр хөгөө чирсэн залуу хэн байв

Өмнөд Африкийн Сонсголгүй иргэдийн холбооноос Ерөнхийлөгч агсан Нэльсон Мандэлаг үдэх томоохон арга хэмжээнд  хэлмэрчээр ажилласан хүний эсрэг гомдол мэдүүлсэн байна.

Тус улсад төдийгүй дэлхийд данстай энх тайвны зүтгэлтэнг сүүлчийн замд нь үдэх олон улсын шинжтэй арга хэмжээнд төрийн тэргүүний хэлсэн үгийг сонсголын бэрхшээлтэй иргэдэд хүргэх үүрэгтэй хэлмэрч залуу агаарт гараа савчиж ямар ч утгагүй үйлдэл хийсэнд хөгжлийн бэрхшээлтэй иргэд төдийгүй, арга хэмжээг онлайнаар шууд үзсэн үзэгчид ч дургүйцэж байгаа юм. Түүхэн дэх чухал үйл явдлыг ийнхүү бусниулсан нь арга хэмжээ зохион байгуулагчдын төдийгүй цаашлаад Өмнөд Африкийн хувьд ихээхэн ичгэвтэр хэрэг юм.

Хачирхалтай  нь энэ дүр эсгэгч залууг хэн болохыг хэн ч мэдэхгүй байгаа юм.  Яаж энэ үйл ажиллагаанд  оролцсон, яах гэж ийм увиагүй үйлдэл хийсэн нь ч тодорхойгүй байна. АНУ-ын ерөнхийлөгч  Барак Обама, Өмнөд Африкийн ерөнхийлөгч Жэкоб Зума нарыг мянга мянган хүний өмнө гашуудан, хүндэтгэлийг үг хэлж байхад хажууд нь хээв нэг гараа савчиж зогссон энэ эрийг дэлхий нийтээр сураглаж байна.