Мөстлөгийн эрин АНУ, Канадыг нөмөрч эхэллээ

АНУ, Канадад агаарын хэм эрс буурч, олон зуун жилийн дунджаас хүйтэрч эхэлсэн нь эрх баригчдыг зовоож байгаа бол эрдэмтэд ч сэтгэл сэрхийлгэм мэдээ дуулгажээ. Тэдний үзэж буйгаар, дэлхийн уур амьсгалын өөрчлөлт бөмбөрцгийн зарим бүст мөстлөг үүсгэж болзошгүй ба түүнд нь Хойд Америк өртөж байгаа аж.

Одоогоор Америк, Канадын ихэнх газар нутаг 60 см-ээс дээш цасанд хучигдсан байна. Үүнээс болж зөвхөн даваа гаригт л гэхэд 3700 нислэг цуцлагдаж, ослын буулт хийжээ. Эрс хүйтэрсэн бүс нутгийн сургууль, цэцэрлэгүүд хаалгаа барихад хүрч, эрх баригчид нь иргэдийг шаардлагагүй бол гэрээсээ гарахгүй байхыг анхааруулсан байна.

Мөн 24 цагийн дотор 16 хүн осгож, хүйтнээс улбаатай ослоос болж амиа алдав. Одоогоор:

-Өчигдрийн байдлаар Нью-Фаунлэнд, Канадад 5000 гаруй өрх эрчим хүч, хий нийлүүлэлтээс тусгаарлагдаж, гэртээ гал түлэхээс аргагүйд хүрчээ.

-Нью-Йоркийн амбан захирагч Эндрью Гуомо тушаал гаргаж, онцгой үйл ажиллагаагүй байгууллагуудыг түр хугацаанд ажиллахгүй байлгах арга хэмжээ авсан байна. Мөн онцгой байдал зарлаж, шаардлагатай тохиолдолд иргэдэд тусламж үзүүлэхэд бэлэн байлгахыг холбогдох албаныханд анхааруулжээ.

-Канзас дахь Үндэсний цаг уурын албаны мэдээлж буйгаар энэ мужид 1912 онд хамгийн их хүйтэрч, агаарын хэм -22 болж байжээ. Харин одоо өдөртөө -25 хэмд хүрч байгаа нь хамгийн хүйтэн тохиолдол болсон байна.

-Өмнөд Дакотад хэт хүйтэрсний улмаас нялх мал, жижиг амьтад хөлдөж үхэх тохиолдол олноор бүртгэгдэж, фермерүүд төл малаа гэртээ оруулж эхэлсэн гэнэ.

-Онтарио мужийн Тандер Бэйд даваа гаригийн үдэд агаарын хэм -33 хэмд хүрчээ. Энд цанын баазад 300 гаруй хүн цасанд боогдсон ба тэнд хий, цахилгаан тасарсан учраас агаарын хүчний туслалцаа авахаар болжээ.

Одоогийн байдлаар АНУ-ын хойд мужуудад -51 хэмд хүрч хүйтэрч байгаа нь Хойд туйлаас үлээж буй хүйтэн салхитай холбоотой аж. Сүүлийн 100 жилд тохиогоогүй энэ их хүйтрэлийг эрдэмтэд мөстлөгийн эхэн үе гэж үзэж байгаа юм.

Тивүүдийн хамгийн хүйтэн газрууд

Антарктидын Восток цэг -89С

Хойд Америк, Канадын Юкон -63С

Европ, Оросын Уст Шугор -58С

Өмнөд Америк, Аргентины Сарменто -32С

Африк, Мороккогийн Ифрэн -23С

-Авсрали, Нью Саут Уайлс -23С