Дайны шуурганд өртсөн африк хүүхдүүд

Өнөөгийн дэлхий III дайны гашуун зовлонг амсаагүй байгаа хэдий ч, хүн төрөлхтөн энэ гамшгийг хэзээ ч хүсэхгүй нь тодорхой ч дайн тулаанд өвдөг сөхөрч буй олон улс үндэстэн байгаа.

Ялангуяа Африк, Ойрхи Дорнодод дайн үргэлжилсээр байна. Дотоодын хямрал, хөршийн дайсагнал, авлига хээл хахууль, баялгийн хараалаас үүдэлтэй эдгээр дайнд олон сая хүн амиа алдаж, хүн төрөлхтний агуу түүхийн мянг мянган үнэт дурсгал газрын хөрснөөс арчигдан, тэрбум гаруй хүн аймшигт явдлын хар толбыг сэтгэлээсээ үүрд арчихааргүйгээр шархалжээ.

НҮБ-ын судалгаагаар яг одоо 200 сая гаруй хүн өлсгөлөнд нэрвэгдэж, цэвэр ус, хоол хүнс, дулаан хувцсаар гачигдаж байгаа аж. Тэд өдөр бүр, цаг тутам, мөч бүхэнд тэнэсэн сум, тэсрэх бөмбөг, яргачдын гараас зугтан айж, түгшиж байна.

Энэ талаарх бодит баримт болох дайнд туйлдсан Африкийн ард түмний тухай гэрэл зургуудыг хүргэе. Өнөөгийн байдлаар Судан, Алжир, Ливи, Зааны ясан эрэг, Чад, Төв Африкийн Бүгд найрамдах улс, Кени, Нигер, Дарфурт дайн болж байгаа бөгөөд өдөр бүр мянга мянган хүүхэд эмэгтэйчүүд золиос болон амиа алдсаар байна.