Живсэн онгоцны ахмад хамгийн түрүүнд аврах хантааз өмсөж, үсэрчээ

Цаг агаарын тааламжгүй байдал, булингартай ус, хүчтэй салхи зэрэг байгалийн хүчин зүйл Өмнөд Солонгосын живсэн хөлөг онгоцны зорчигчдыг хайх ажилд саад учруулж байна. Өнгөрсөн лхагва гаригт 475 зорчигчтой явсан онгоц живж, 271 хүн сураггүй болж, 25 нь амиа алдсан юм.

Албаныхан 179 хүнийг аварсан гэж мэдэгдсэн. Зорчигчдын ихэнх нь ахлах сургуулийн сурагчид байсан ба одоо ослын газарт БНСУ-ын Ерөнхийлөгч өөрийн биеэр ажиллаж байна.

Ерөнхийлөгч Пак Гинхэ “Мөч, хором бүхэн бидэнд дэндүү үнэтэй. Тиймээс Өмнөд Солонгосын ард түмэн бүгд энэ ажилд туслана уу” гэжээ. “Ёнхап” агентлагийн мэдээлснээр, сураггүй бологсдын дунд нэг орос, хоёр хятад хүн байсан аж.

Хамгийн гол нь цаг агаарын нөхцлөөс болж шумбагчид живсэн хөлөг рүү нэвтэрч чадахгүй байна. Өчигдөр болсон хэвлэлийн хурлаар, Эргийн хамгаалалтын алба хөлөг онгоцны живсэн шалтгааныг тодруулж байгаа гэсэн. Учир нь гаталга онгоц яагаад живсэн, юуны учир хажуулдан доошилсон зэрэг нь тодорхойгүй байгаа юм.

Одоо цагдаа нар зорчигчдын ар гэрийнхнээс мэдүүлэг авч байна. Хөлөг онгоцны ахмад Лий Жүнсёк аврагдсан хүмүүсийн нэг бөгөөд телевизээр дамжуулан ард түмнээс уучлал хүсч “Би юу хэлэхээ мэдэхгүй байна. Яах ёстойгоо ч бас мэдэхгүй байна. Ард түмнээс уучлал эрж байна” гэжээ.

Гэхдээ гэрчүүдийн мэдүүлснээр, тэрбээр хөлөг онгоцноос хамгийн түрүүнд үсэрсэн хүмүүсийн нэг аж. Шар тэнгист одор тэнгисийн цэргийн 171 хөлөг, 19 онгоц, 500 шумбагч ажиллаж байгаа.

Хөлөг онгоц живсэн газартай хамгийн ойр Жинду арал дээр сураггүй болсон зорчигчдын ар гэрийнхэн цугларчээ. Тэд “Миний хүүхдийг онгоцноос гаргаж өгөөч. Тэр минь одоо ч амьд байгаа” гэсэн бичиг барин жагсжээ.

“Сэвол” хөлөг онгоц анх Инчон боомтоос хөдөлж, Чежү арлыг зорьсон байна. “Ёнхап”-ын мэдээнд дурдсанаар, амь үрэгдэж, цогцос нь олдсон зорчигчид 17 настай сурагчид, 25 настай багш, 22-той эмэгтэй байжээ. Тэдний биед бичиг баримт нь байгаагүй учраас таних ажиллагаа явагдаж байгаа аж.

Хөлөг онгоц 30 метрийн гүнд живсэн. Гэвч дотор нь өнөөг хүртэл зарим зорчигч амьд байгаа гэх горьдлого бий. Учир нь усны гүнээс нэгэн сурагч аав руугаа мессеж илгээсэн ба тэнд цөөн хүн байгааг мэдэгдсэн юм.

Д.Маргад