460 сая ам долларын экспорт хийхээр төлөвлөж байна

Монгол Улсын Засгийн газраас арьс ширний үйлдвэрлэлийг сэргээн хөгжүүлэх төслийн хүрээнд 140 тэрбум төгрөгийн санхүүжилтийг Хөгжлийн банкаар дамжуулан арьс ширний үйлдвэрлэл эрхлэгчдэд олгохоор шийдвэрлэж, одоогийн байдлаар 25 төсөлд 50.9 тэрбум төгрөгний санхүүжилтийг олгоод байна. Арьс ширний үйлдвэрлэлийг хөгжүүлэх төслүүдэд санхүүжилт хийсний үр дүнд арьс ширийг бүрэн боловсруулж эцсийн бүтээгдэхүүн хийх зорилгоор техник, технологийн шинэчлэлт хийж, түүхий эдийн нөөцөө бүрдүүлэхээр ажиллаж байгаа юм. Ингэснээр салбар бүрэн сэргэж арьс ширэн гутал, хувцас, эдлэл зэргийг үйлдвэрлэн жилд дунджаар 1.0 их наяд төгрөгтэй тэнцэхүйц бараа, бүтээгдэхүүн үйлдвэрлэх аж. Үүнээс 460.0 орчим сая ам.долларын экспорт хийхээр төлөвлөж байгаа бөгөөд 20 гаруй мянган ажлын байр шинээр бий болох зэрэг нийгэм, эдийн засгийн олон чухал, ач холбогдол бүхий ажил болж байна. Арьс ширний үйлдвэрлэлийг сэргээн хөгжүүлэх төсөл амжилттай хэрэгжснээр салбарын хэмжээнд жилдээ савхин хувцас 65.000 ширхэг, савхин бээлий 200.000 хос, нэхий хувцас 30.000 ширхэг, гутал 200.000 хос, цүнх 60.000 ширхэг, бэлэг дурсгал, жижиг эдлэл 1.200.000 ширхэг бүтээгдэхүүн үйлдвэрлэх боломж бүрдэж буй бөгөөд дотоодын хэрэгцээг 100 хувь хангахаар зорьж байна.