Эрчим хүчний салбарынхан өнгөрөгч онд ...

Эрчим хүчний салбарт өнгөрсөн онд 21 үйлдвэр, компаниуд 30.7 тэрбум төгрөгийн алдагдалтай ажилласан байна. Энэ нь өмнөх онуудтай харьцуулбал буурсан үзүүлэлт гэдгийг салбарынхан онцолж байна.

Тодруулбал, эрчим хүчний салбарын үйлдвэр, компаниудын гүйцэтгэх захирлуудын өргөтгөсөн шуурхай зөвлөгөөнөөр салбарын өнгөрсөн оны үйлдвэр, хэрэглээний гүйцэтгэл, үйл ажиллагааны тайланг хэлэлцсэн бөгөөд салбарын 2014-2015 оны өвлийн горим ажиллагаа, гарсан хүндрэл, шийдвэрлэсэн байдал, 2015-2016 оны өвлийн бэлтгэл хангах нэгдсэн төлөвлөгөө, түүнд зарцуулах хөрөнгийн асуудлыг хэлэлцжээ.

Үүнд дурдсанаар Монгол Улсын эрчим хүчний нэгдсэн системийн хэмжээнд өнгөрсөн онд 5476.7 сая кВт.цаг цахилгаан эрчим хүч, 7075.5 мянган гкал дулааны эрчим хүч үйлдвэрлэсэн байна. Эрчим хүчний үйлдвэрлэлийг 2013 онтой харьцуулахад цахилгаан эрчим хүч 6.7 хувиар буюу 344.4 сая кВт.цагаар, дулааны эрчим хүчний үйлдвэрлэл 4.3 хувиар буюу 305.2 мянган гкал-аар тус тус өсжээ.