Зам тээврийн яам сайд бэлтгэх дамжаа болсныг хэлэв

Сүүлийн жилүүдэд зам тээврийн салбарт томилогдсон сайдууд цахилгаан, тайзны засал чимэглэл, зураач, хууль, геологи, барилгын мэргэжилтэй хүмүүс байсан. Өөрөөр хэлбэл, энэ салбарт нэгдсэн бодлого үгүй ​​болж, мэргэжлийн бус хүмүүсийн албан тушаал наймаалцах талбар болж хувираад удлаа.

Зам тээврийн салбарт ажлаа мэддэг, туршлагатай, мэргэжлийн хүнийг томилох шаардлагатайг мэргэжлийн холбоодынхон дуу нэгтэйгээр хэлж, төрийн өндөрлөгүүдэд ил захидал хүртэл бичсэн. Гэвч засаг бүрдүүлж байгаа эрх мэдэлтнүүдэд мэргэжлийн холбоод, салбарынхны дуу хоолой хамаагүй бололтой. Ерөнхий сайд зургаан сайдын нэрийг өргөн барьж, Зам тээврийн сайдаар бас л салбараа мэддэггүй мэргэжлийн бус хүнийг томилох гэж байна.

Зам тээврийн салбарыг мэддэг, сайд болох туршлага, мэдлэг, чадвартай, үлдсэн богино хугацаанд энэ салбарыг авч явах ёстой хүн хэмээн мэргэжлийн холбоодынхон хэлж тийм хүнийг битүүхэндээ дэмжиж байсан.  Гэсэн ч энэ удаад ч мөн мэргэжлийн бус "туршилтын" сайдтай болох нь хэмээн ам муутай байна. Ямартай ч энэ яаманд УИХ-ын гишүүн М.Зоригтыг нэр дэвшүүлэн Засгийн газраар хэлэлцэж байна.  

Нөгөө талаас “Зам тээврийн салбарыг туршлагатай хүн удирдвал богинохон хугацаанд ч гэсэн ажил урагшилж, ирэх сонгуульд АН-ынхны нэр хүнд өсөхөд нөлөөлөх байсан . Харин Ерөнхий сайдын хувьд фракцийн шантаажнаас гарч чадсангүй” зам тээврийн салбарынхан халаглаж сууна.