“Малайзын MH17 онгоцыг ОХУ-д үйлдвэрлэсэн пуужингаар сөнөөсөн”

Өнгөрсөн жилийн долдугаар сард Украины дотоодын сөргөлдөөн бүхий бүс нутагт Малайзын иргэний агаарын тээврийн MH17 нислэгийн дугаартай онгоц сүйрсэн билээ.

Тус онгоцонд 298 хүн зорчиж явсан бөгөөд бүгд амиа алдсан юм.  Улмаар Голландын Аюулгүй байдлын комисс тэргүүтэй Олон улсын шинжээчдийн баг онгоцны хэлтэрхийнүүдийг цуглуулж, чухам ямар шалтгааны улмаас сүйрсэн болохыг нь тогтоохоор ажиллаж байсан юм.



Тэгвэл шинжээчдийн баг өчигдөр хамгийн сүүлийн тайлан мэдээгээ олон нийтэд дэлгэлээ. Улмаар гарсан дүгнэлтэд нь ОХУ-д үйлдвэрлэгдсэн газар-агаар ангилалын “Бук” пуужингаар онгоцыг сөнөөсөн хэмээн дурьдагджээ.

Хэргээс хойш эдүгээ жил гурван сарын хугацаа өнгөрсөн ч, ОХУ болон Барууны орнууд урьдын адил хариуцлагыг бие биеэсээ бултуулсаар байна. Тайланд бичигдсэнээр пуужинг харвасан бүс нь Украины зүүн этгээд дэх 320 хавтгай дөрвөлжин км талбай аж.

Гэхдээ энэ талбай Украины Засгийн газрын цэргүүдтэй дайтаж байсан Оросын талыг баримтлагч салан тусгаарлагчдын хяналтад байсан бүс мөн эсэх нь талаар тодорхой тайлбар өгөөгүй ч, Голландын комиссын тэргүүлэгч Тжиббе Жоустра  сэтгүүлчдэд мэдээлэл хийснийхээ дараа “тухайн бүс нутгийг салан тусгаарлагчдын хяналтад байсан бүс” хэмээн орон нутгийн телевизэд ярилцлага өгөхдөө хэлжээ.

Эдүгээг хүртэл онгоцыг сөнөөсөн талаарх олон таамаглал гарч байсан бөгөөд түүний нэг нь “Бук” пуужингаар сөнөөсөн гэх таамаг байсан юм. Гэхдээ одоогоор ОХУ салан тусгаарлагчдад пуужин нийлүүлсэн гэдгээ хүлээн зөвшөөрөхгүй байгаа юм.

Б.Даваа