Трампыг индрээс яаралтай холдуулжээ

Өнгөрөгч бямба гаригт АНУ-ын ерөнхийлөгчийн сонгуульд бүгд найрамдахчуудаас нэр дэвшин өрсөлдөж буй Дональд Трамп Невада мужийн Рено хотод сонгогчидтой уулзалт хийж байх үеэр аюулгүй албаны ажилтнууд түүнийг индрээс яаралтай холдуулсан байна. Энэ тухай NBC News өөрийн твиттер хуудсаар мэдээлжээ.

Уг болсон явдлын бичлэгээс харахад, хоёр хамгаалагч залуу Трампыг мөрнөөс нь дэмнэж өөрсдийн мөрөөр түүнийг халхлан, хөшигний араар яаралтай оруулж байна. Эх сурвалжид дурдсанаар, уулзалт хийж буй танхимд зэвсэгтэй хүн байна гэх мэдээлэл Нууц албаныханд очсон бөгөөд уг этгээдийг баривчилсан аж.

Энэ явдлаас хэдэн минутын дараа Трамп индэр рүү дахин гарч ирэн: “Биднийг хэзээ ч зогсоож чадахгүй” гэх үгсээр яриагаа ахин эхлүүлсэн байна. Тэрээр өөрт нь ихэд анхаарал тавин тусалж дэмжсэн Нууц албаныхан, орон нутгийн хууль сахиулах байгууллагууд болон өөрийн дэмжигчдэдээ талархал илэрхийлсэн аж. 

 VIDEO - Donald Trump Rushed Off Stage at Nevada Rally by Secret Service - 11/5/16

Д.Мөрөн