В.Путин, Д.Трамп хоёрын нэгдлээс БНХАУ, Английн удирдагчид болгоомжилж эхэллээ

АНУ-ын Ерөнхийлөгчийн сонгуульд ялалт байгуулаад буй Доналд Трампыг ОХУ-ын Ерөнхийлөгч В.Путин сонгуулийн эхний өдрөөс дэмжиж ирсэн нь ажиглагчдын анхаарлыг татаж байна. Тэдний бие биенээ магтсан, хөхиүлэн дэмжсэн байр суурь нь хоёр хүний хувь харилцаанаас илүү хоёр гүрний цаашдын харилцааны тухай асуудал болон яригдаж байгаа билээ. ОХУ-ын Ерөнхийлөгч В.Путин АНУ-ын Ерөнхийлөгчийн сонгуулийн талаар нэг л удаа ам нээсэн бөгөөд энэ үеэрээ Д.Трампыг дэмжиж байгаагаа илэрхийлсэн гэж болно. Тэрбээр тэрбумтан Дональд Трампийн талаар өөрийнхөө бодлыг хэлж, “Орос улс нь Америкийн Ерөнхийлөгчийн сонгуульд хөндлөнгөөс оролцох, нөлөөлөх ямар ч сонирхолгүй. Гэхдээ нэр дэвшигч Д.Трамп бол тус улсын ард түмний хүсэл зорилгыг төлөөлж буй гол хүн мөн. Д.Трамп бол ард түмнийхээ адилаар сүүлийн хэдэн арван жилийн турш засаг барьсан эрх баригчдадаа шүүмжлэлтэй ханддаг хүн шүү дээ.” хэмээн ярьжээ. Ийн ярьсан нь ОХУ өрсөлдөгчийг нь дэмжиж, бүх талын туслалцаа үзүүлдэг гэх Хиллари Клинтоны хардлага үнэний ортой байсныг харуулсан хэрэг боллоо хэмээн олон улсын ажиглагчид тэмдэглэж байсан. Хойд хөршийн төрийн тэргүүн ярианыхаа төгсгөлд “Орос улс аль нэр дэвшигчийг дэмжих, эс дэмжихээс хамааран сонгуулийн үр дүнгээр ялалт байгуулсан хэнтэй нь ч найрсаг харьцаж, хоёр орны харилцааг халуун дулаан болгоход анхаарна” гэсэн юм. Харин сонгуулийн дүнгээр Д.Трамп АНУ-ын дараагийн Ерөнхийлөгчөөр сонгогдлоо. Өөрөөр хэлбэл, Д.Трамп ирэх дөрвөн жилд АНУ болон ОХУ-ын хоорондын харилцааг тодорхойлох гол хүн боллоо. Харин эсрэг талд В.Путины бүрэн эрхийн хугацаа 2018 онд дуусна. Гэвч тэрээр дахин сонгогдох магадлал тун өндөр гэдгийг судалгааны дүн харуулсаар байгаа. Улс төрийн нам, улстөрчдийн чансааг гаргах чиглэлээр мэргэшсэн “Левада центр” судалгааны төв “2018 оны Ерөнхийлөгчийн сонгуульд хэнийг дэмжих вэ” гэсэн санал асуулгыг иргэдийнхээ дунд явуулахад оролцогчдын 57 хувь нь одоогийн ерөнхийлөгч В.Путиныг, эсвэл түүний бодлогыг үргэлжлүүлэх улстөрчийг дэмжихээ илэрхийлсэн бол зургаахан хувь нь өөр улстөрчийг нэрлэжээ. Мөн 48 хувь нь В.Путиныг хэн ч орлохгүй хэмээн санал нэгдсэн байдаг.

Үүгээр бол В.Путин дутуу байгаа хоёр жил, улмаар түүний дараагийн зургаан жилд дахин засаглах нь. Хэрвээ В.Путин, Д.Трамп хоёрын ойлголцол, дотносол цаашид хэвээр үргэлжилбэл энэ нь АНУ, ОХУ-ын нэгдэл болж, олон улсад ойлгогдох нь мэдээж юм. Тэр ч утгаараа БНХАУ, Англи зэрэг улсууд Д.Трамп Ерөнхийлөгч болсонд тааламжтай бус хандаж байгаагаа илэрхийлж эхлээд байна. Тухайлбал, Хятадын төв хэвлэлд "Д.Трамп Ерөнхийлөгчөөр сонгогдсон нь Америкийн ардчиллын сул тал" гэдэг утгатай нийтлэл гарчээ. Харин Их Британид Д.Трампыг эсэргүүцэх хөдөлгөөн, жагсаал болж байна. Учир нь энэ хоёр хүний нэгдэл гэдэг бол ирээдүйд их хоёр гүрний нэгдэл гэж харагдаж байгаа учраас олон улсын удирдагчдын түвшинд тодорхой болгоомжлол бий болоод эхэлжээ. 

Д.Ирээдүй