”Ж.Батзандан намын дарга болбол өөрөө сайд болох гээд намаа зарчих байлгүй” гэв

Ардчилсан нам намын даргад өрсөлдөх нэр дэвшигчдээ нийт гишүүдийнхээ  саналаар сонгохоор болсон билээ. Үүний дагуу өнгөрсөн амралтын өдөр АН-ын даргын сонгуульд өрсөлдөх хүмүүс бүрэн тодорч дууссан. Тэд дөнгөж сая нэр дэвшигчийнхээ үнэмлэхийг гардан авлаа.

 Намын даргад УИХ-ын гишүүн Д.Эрдэнэбат, С.Эрдэнэ, Ж.Батзандан, гишүүн асан Н.Алтанхуяг, Л.Гантөмөр нарын  нийт таван хүн өрсөлдөхөөр болоод байгаа юм. 

 Харин Ерөнхийлөгчийн Тамгын газрын даргын албан тушаалаа өгч, намын даргад өрсөлдөхөөр мэдэгдээд байсан  П.Цагаан, УИХ-ын гишүүн асан Г.Батхүү нар нэрээ татсан. УИХ-ын гишүүн асан Г.Батхүү энэ тухай  өөрийн фэйсбүүк хуудсаараа дамжуулж “Сунгаанд бүрэн итгэлтэй байсан ч нам дотоод нөөцөө ганц өрсөлдөөнөөр шавхах хэрэггүй гэж үзээд нэрээ дэвшүүлсэнгүй” хэмээн мэдэгдсэн байдаг. 

Намын даргад өрсөлдөгчдийн талаар Ардчилсан намын зарим гишүүд өөр өөрсдийн  байр сууиа илэрхийлээд эхэлжээ. Тухайлбал, УИХ-ын гишүүн асан Х.Тэмүүжин өөрийн албан ёсны хуудастаа Ж.Батзандангийн талаар “Ахыгаа төрийн нарийн болгох гээд АН-ын Засгийг МАН-тай нийлээд унагачихдаг хүн намын дарга болбол өөрөө сайд болох гээд намаа зарчих байлгүй” гэж жиргэсэн юм.

Тэгвэл дээрх жиргээнд  УИХ-ын гишүүн Ж.Батзандан ийн хариу бичжээ. Тэрбээр  “Намын сунгаанд оролцогч журмын нөхөддөө нэгнээ гүтгэлгүй, гишүүдээ талцуулалгүй эргэж уулзах нүүртэй, шударгаар өрсөлдөхийг уриалж байна” гэжээ.

Б.Алтжин