АН-ын ”шинэчлэлийн” төлөөх гарын таван хуруу

Ардчилсан намын даргад нэр дэвшигчдэд нэр дэвшигчийн үнэмлэх гардуулах ажиллагаа өнөөдөр Blue Sky-д боллоо. АН-ын даргад С.Эрдэнэ, Д.Эрдэнэбат, Л.Гантөмөр, Ж.Батзандан, Н.Алтанхуяг нар дэвшихээр болсон. АН-ын шинэчлэлийн бодлогод бусад нэр дэвшигчийн шинэлэг санаачлагыг тусгах үүрэг хүлээж,  хамтын гэрээ байгуулж, гарын үсэг зурсан юм. 

Тус арга хэмжээг нээн АН-ын  дарга М.Энхболд үг хэлэв. Тэрбээр "АН VI-дугаар Их хурлаа хийж өнгөрсөн УИХ-ын сонгуулийн алдаа, оноогоо дүгнэж намын даргаа анх удаа нийт гишүүд дундаасаа сонгох болсон.  АН үеийн үед анхдагч нам байсаар ирсэн. Бид өнөөдөр ч гэсэн Монголын улс төрийн намуудаас анхдагч нь байна. Яагаад гэвэл намын даргаа нийт гишүүд дундаасаа сонгох хамгийн анхны нам боллоо. Цаашид бусад улс төрийн хүчнүүдийг энэ жишгээр шинэчлэгдээсэй гэж хүсэж байна. Намын даргын сонгуульд нэр дэвшигчдэд ямар нэгэн шалгуур байгаагүй. Сунгааны журмын дагуу материалуудаа ирүүлж, орж чадаагүй нэгэн нь бухимдлаа сошиалаар илэрхийлээд байна. Дүрэмдээ хэн нэгэн гишүүнийг нас, зүс, туршлагаар нь ялгасангүй. Манай намыг шинэчлэлээр нь далимдуулж 20 гаруй жил АН-ыг харлуулж ирсэн  МАН-ынхан манай намын шинэчлэлд их санаа зовж байх шиг байна. Бидний сонгуулиас хол бай. Энэ бол манай 180 мянган гишүүний ажил юм. Та наргүйгээр болно оо. Харин үүний оронд Улаанбаатрынхаа утаанд санаа зов. Нэр дэвшсэн таван гишүүндээ баяр хүргэе. Та бүхний хэн нь ч ялсан, ялагдсан бай ялсан даргадаа амжилт хүсээрэй. Намын дүрмээ хэлбэрдэхгүй мөрдөнө гэдэгт итгэж байна" гэв. 

Үүний дараа нэр дэвшигчид сонгуулийн хороонд бүртгүүлсэн нэрсийн дарааллаар үг хэлсэн юм.  

АН-ын даргад нэр дэвшиж буй УИХ-ын С.Эрдэнэ хэлсэн үгэндээ "Би өнөөдөр эрхэм нөхдөө өрсөлдөгч гэж харахгүй.  Харин хамтран зүтгэгч гэж харж байгаа. АН-ыг байгуулагдсан тэр цагаас эхлээд өдгөө 26 жилийн турш энэ намыг алдаж, онох бүрт нь хамт явлаа. Энэ сонгуулийг бидний дотоодын тэмцэл өрсөлдөөн гэж битгий хараасай. Энэ бол  шинэчлэлийн төлөө  хийж байгаа бидний хамтын ажиллагаа юм шүү. Эрхэм журмын нөхөддөө амжилт хүсье. Бидний хэн нь ч ялсан бай би ардчилсан намынхаа шинэчлэл ирээдүйн төлөө, эх орныхоо сайн сайхны төлөө зүтгэх болно" гэлээ. 

УИХ-ын гишүүн Д.Эрдэнэбат "Би намын даргын сунгаанд оролцох эсэхээ хувь хүнийхээ хувьд маш эргэлзсэн. Гэхдээ "Энэ сунгаанд оролцох нь намын нэр хүндийн асуудал" шүү гэдгийг манай намын үе үеийн гишүүд дэмжигчид хэлсэн учраас би өнөөдөр нэр дэвшиж байна. Өнгөрсөн УИХ-ын сонгуульд бид унасан нь АН-д сургамж болоод цаашаа намаа хэрхэн авч явах уу гэдэг дохиог бидэнд өглөө. Орон нутгийн сонгуульд АН үндэсний хэмжээний нам байсан юм гэдгээ нотлон харууллаа. Саяны болж өнгөрсөн намын Их хурал Монголд ардчилал дэмжигчдийн үзэл санаа хэвээрээ байгаа юм байна гэдгийг мөн нотоллоо. АН-ын даргын сунгаа Монголын АН-ын дотоод эв нэгдэл төдийгүй Монголын ард түмний эв нэгдлийг төлөөх сонгууль болж байгаа юм шүү. Бүгдээрээ хөтлөлцөөд энэ сонгуулийн ард хамтдаа гарна аа. Сонгууль болсны маргаашнаас эхлээд манай намын нүүр царай өөрчлөгдөж бид эв нэгдэлтэй, бие биенээ дэмжсэн бодлоготой, хариуцлагатай нам байх болно  гэдэгт би огт эргэлзэхгүй байна" гэлээ. 

УИХ-ын гишүүн асан Л.Гантөмөр "Энэ удаагийн сонгууль Их хурлаас гарсан шийдвэрийг хэрэгжүүлэх улмаар ажил хэрэг болгох зорилгоор намын даргыг сонгож байгаагаараа онцлогтой байна. "Гишүүдийн үгээ сонсдоггүй" гэж бүх шатандаа итгэл алдарсан. Тиймээс энэ удаагийн намын даргын сунгаа, шинэчлэлийн хөдөлгөөний хэлэлцүүлэг АН-ын гишүүдийн итгэлийг сэргээнэ гэдэгт найдаж байна. АН гишүүдийнхээ төлөөх нам болоосой гэж чин сэтгэлээсээ хүсэж байна. Хүний нөөцийн зөв бодлоготой нам болоосой гэж би намын даргын сунгаанд нэрээ дэвшүүлж байгаа юм. Хариуцлагатай нам болох хэрэгтэй. Хамгийн гол нь АН эв нэгдэлтэй нам болж ирэх сонгуулиудад олон түмнийхээ итгэлийг буцаан авах шаардлага тулгараад байна" гэлээ. 

УИХ-ын гишүүн Ж.Батзандан "АН-ын шинэчлэл эхлэж байна. АН яагаад шинэчлэгдэх ёстой вэ гэж олон хүн асууж байгаа. Тэгвэл үүнд би хариулъя. Монголыг шинэчлэх шаардлагатай байгаа учраас АН шинэчлэгдэх ёстой юм. Монголын төрд шинэчлэл хэрэгтэй байгаа учраас АН шинэчлэл хийх шаардалагатай байгаа юм. Манай намын 180 гаруй гишүүд өнөөдрөөс шинэчлэлийн хөтөлбөрөө эхлүүлж байна. 

АН-ын шинэчлэгдэхийн тулд эхлээд бүх хаалга, цонхоо ард түмнийхээ өмнө нээх ёстой. Өөрөөр хэлбэл хаалттай биш нээлттэй нам болох байр суурийг миний бие баримтлаж байгаа. Мөн хүний эрх, эрх чөлөө, шударга ёсны төлөө өөрчлөгдөх ёстой.  Бид бүлэглэлд биш бүх  гишүүддээ үйлчилдэг нам болох ёстой. Нэгдмэл үзэл бодолтой АН-ыг бий болгохын төлөө энэ шинэчлэл явагдах болно. АН-ын шинэчлэл өөдөө байх болтугай" гэв. 

Ерөнхий сайд асан Н.Алтанхуяг "Нэрээ дэвшүүлсэн гарын таван хуруундаа баяр хүргэе. Би намын даргын сонгуульд нэрээ дэвшүүлэх шийдвэрийг нэлээд хожуу гаргасан. Нэр дэвших шийдвэрийг журмын нөхдийнхээ санал хүсэлтийг хүндэтгэн хүлээн авлаа. Намаа гэсэн сэтгэл зүрхтэй хүмүүс ахмад, дунд үе, залуучууд нь намынхаа төлөө гар гараасаа барилцаад хамтдаа зүтгэх цаг болсон. АН-ын их хурлын үеэр орон нутгийн төлөөллүүд ч гэсэн асууж, санал хэлсэн.  Бид бие биенээ ойлгож, хамтран ажиллая гэдэг саналыг гишүүд олноороо хэлсэн. АН-ын олон гишүүдийн саналыг хүлээн авч монголдоо иргэн бүр сайхан амьдрахын төлөө хамтдаа ажиллая гэж намын даргад өрсөлдөж  байна" гэлээ. 

Б.Алтжин