Хойд Солонгос БНСУ-аас эдийн засгийн бүх харилцаагаа дахин тасаллаа

БНАСАУ-ын эрх баригчид  БНСУ-тай эдийн засгийн бүх харилцаагаа тасалснаа зарлалаа. Мэдэгдэлд “Нутаг дэвсгэрт үйл ажиллагаа явуулж байгаа БНСУ-ын фирмүүдийн үйл ажиллагааг зогсооно” хэмээн дурьдсан байсан бөгөөд энэ нь хоёр орны эдийн засгийн хамгийн том хамтарсан төсөл болох Кэсоны аж үйлдвэрийн цогцолборыг хэлж байгаа нь ойлгомжтой юм.

БНАСАУ өмнө нь Кэсоны аж үйлдвэрийн цогцолборыг “Чхонан” хөлгийг сөнөөсөн хэрэг явдал дэгдэж, хоёр орны харилцаа урьд байгаагүйгээр хүйтэрсэн 2013 онд л хааж байсан юм. Гэвч “Дахиж хаахгүй” гэсэн амлалт өгөн байж зургаан сарын дараа буюу 2013 оны аравдугаар сарын 16-ны өдөр нээж байв.

Кэсон дахь үйлдвэрийн цогцолбор нь хоёр улсын харилцаа сайжирч байх үед буюу 2003 онд хилээс дотогш 10 километр зайд БНАСАУ-ын нутагт байгуулагдсан, хойдуудын хувьд ганц “мөнгө хийдэг” газар нь юм. Тус Эдийн засгийн бүс, аж үйлдвэрийн цогцолборт 100 гаруй үйлдвэр байдаг бөгөөд хойд Солонгосын 50 мянган гаруй ажилтан ажилладаг юм.

Кэсоны аж үйлдвэрийн цогцолборын тухай

-Хоёр улсын эдийн засгийн хамтын ажиллагааг өргөжүүлэх бодлогын хүрээнд 2003 онд байгуулагдсан. 

-120 гаруй үйлдвэр ажиллаж, гаргасан бүтээгдэхүүнээ БНСУ-д экспортлодог.

-Жилд 500 орчим сая ам.долларын бараа бүтээгдэхүүн үйлдвэрлэдэг.

-БНСУ-ын компаниуд ажилчдын цалинд жилд 80 сая ам.доллар төлдөг бөгөөд энэ нь тус цогцолбор  Пеньяны хувьд хамгийн их ашиг өгсөн аж ахуйн нэгж нь гэсэн үг юм.

С.Төгөлдөр