Диана гүнжийн цомогт байсан ховор зургуудаас дэлгэжээ
Их Британийн ханхүү Харри, Уильям нар Диана гүнжийн ховор зургуудаас дэлгэжээ. Кенсингтоны ордоны “Instagram” хуудсанд саяхан ханхүү Жоржийн шинэ зураг албан ёсоор байршсан. Ханхүү Уильямын том хүү, ирээдүйн хаан ширээ залгамжлагч Жоржийн дөрвөн насны төрсөн өдөрт зориулан уг зургийг байршуулжээ. Дараахан нь Диана гүнжийн ховор зургуудаас мөн тавьсан байна. Уильям, Харри нар ээжийнхээ дурсгалыг хүндэтгэн, үр хойч нь Диана гүнж гэж хэн байсныг дурсаж яваасай гэж хүсч байгаа аж.
Зургууд Диана гүнжийн хувийн цомогт нь байжээ. Архив болгон хадгалсан байсан зургуудаас олонд дэлгэх болсон нь “Диана, бидний ээж: түүний амьдрал, угсаа залгамж” гэсэн баримтат кино дэлгэцнээ гарахтай холбоотой аж. Кенсингтоны ордоны цахим хуудсанд мөн Диана гүнжийн бичлэг тавигдсан байна. Бичлэгт Диана гүнж хоёр хүүтэйгээ аз жаргалтайгаар тоглон яваа нь олон хүний сэтгэлийг хөдөлгөжээ.
Уэльсийн гүнж Диана ханхүү Чарльзаас салснаасаа жилийн дараа, 1997 оны наймдугаар сарын 31-нд нас барсан юм. Тэрээр найз, тэрбумтан Доди аль-Файедтай хамт Парисын Альма талбайн гүүрэн доорх хонгилоор явж байхдаа осолдон амиа алдсан билээ. Диана дөнгөж 36 настай байсан юм. Тэр өдөр яг юу болсон нь одоог хүртэл оньсого хэвээр байдаг. Гүнжийн автомашин осолдоход нөлөөлсөн зүйл нь түүний араас дагаж байсан сурвалжлагчид гэж үздэг. Сурвалжлагчдаас зугтахдаа жолооч нь гүүрний бетонон тулгуурыг мөргөсөн гэх хувилбар хамгийн түгээмэл нь. Гэвч осол сайтар зохион байгуулагдсан аллага байсан гэж олон хүн үздэг. Диана гүнж уг гүүрэн доогуур явахдаа машинаа сольж суусан шалтгаан, ослын үеэр гүүрэн доор үзэгдсэн учир битүүлэг цагаан машин, түргэн тусламж их удаж ирсэн, гүнжийг машинаас гаргах гэж маш удаан оролдсон гээд олон сэжигтэй зүйл байдаг аж.
A post shared by Kensington Palace (@kensingtonroyal) on Jul 23, 2017 at 12:26am PDT
О.Чанцаа
Холбоотой мэдээ
Сэтгэгдэл ( 0 )