ЕХ-ны хамгийн дуулгавартай орон ОХУ-аас уучлал гуйлаа

Хий дамжуулах “Турецкий поток” хоолойг Москвагийн зүгээс Болгар руу сунгахад бэлэн байна. Орос улс Белене дахь атомын цахилгаан станц бүтээн байгуулах төсөл рүү эргэн очиж магадгүй нь. Энэ тухай Ерөнхийлөгч Владимир Путин Болгарын Ерөнхий сайд Бойко Борисовтой уулзсаны дараа өгүүлжээ.

Дээрх хоёр төслийг цагтаа Болгар улс тасалдуулж байсандаа одоо харамсахад хүрээд байгаа бололтой. Өнгөрөгч долоо хоногт Болгарын Ерөнхийлөгч Сочид ирж байсан бол түүний дараахан Ерөнхий сайд нь Москвад хүрэлцэн ирсэн аж.

Путин түүний гарыг халуун дотноор атган угтахад, Болгарын Ерөнхий сайд тэврэлтээ дэлгэж, тэд олон жилийн турш хүйтэн хөндий харилцаатай байгаагүй мэт харагдаж байв. Бойко Борисов цагтаа “Южный поток” төслийг тасалдуулахын тулд бүгдийг хийж байсан учраас “Белене” АЦС баригдаж дуусалгүй үлдсэн билээ.

Харин одоо энэ тухайгаа тэрээр: “Бид сургамж авсан” хэмээн Кремльд мэдэгджээ. “Би өнгөрсөн хугацаанд тодорхой хэмжээний дарамт шахалт үүсгэж байсныхаа төлөө буруугаа хүлээж байна. Та нар харин энэ бүхнийг муугаар санаж үлдээгүйд би их баярлаж байгаа” хэмээн Болгарын Ерөнхий сайд Бойко Борисов уучлал хүссэн байна.

“Турецкий поток”-ын хоёр дахь салааг Болгарын газар нутаг хүртэл сунгаж өгөхийг тэд Оросоос хүсч байгаа бөгөөд Европын бусад улс орнууд руу хий дамжуулагч улс болохоор шийджээ.

Болгар улс сүүлийн жилүүдэд Европын Холбоо /ЕХ/-ноос өгсөн бүхий л дохио, зааврын дагуу ажилласнаараа өөрсдөдөө асар их хохирол учруулсан байна. Тэд ЕХ хариуд нь тэдэнд дэмжлэг үзүүлнэ хэмээн итгэж найдаж байсан хэдий ч ёстой л нөгөө “Их санасан газар есөн шөнө хоосон” гэгчийн үлгэр болсон аж.

“Бид ЕХ-ны хамгийн сахилга баттай, дуулгавартай орон байсан учраас бүхий л “Потокууд” манайхыг тойрч өнгөрсөн. Энэ байдалтай холбогдуулан бидэнд муу зүйл санаж үлдээгүйд би маш их талархаж байна” гэж Бойко Борисов өгүүлжээ.

Д.Мөрөн

Эх сурвалж: www.Zindaa.mn