2018 онд дуудлага худалдаагаар зарагдсан ХАМГИЙН СОДОН эд зүйлс
Улиран буй энэ онд дэлхий даяар сонин, хачин эд зүйлсийн олон дуудлага худалдаа бүртгэгджээ. Энэ жил олны анхаарлыг татсан дараах эд зүйлс дуудлага худалдаагаар зарагдсан байна.
Цэнгэг усны аварга сувд
Дэлхийд одоогоор хамгийн томд тооцогдож буй цэнгэг усны сувдыг Нидерланд улсад тавдугаар сард болсон дуудлага худалдаагаар 347 мянган ам.доллараар заржээ. “Унтаж буй арслан” гэж нэрлэгдэж буй энэхүү сувд 2.7 инч буюу зургаа гаруй см урт, 113 грамм жинтэй гэнэ. Энэхүү сувд Хятадын Чин улсын үе буюу 1700-аад оны үед хамаарна гэж үзэж буй аж.
Сарны чулуу
1970 онд Зөвлөлтийн Луна-16 сансрын станцаас авчирсан сарны жижиг хэмжээний гурван чулуу Нью Йорк хотноо арваннэгдүгээр сард болсон дуудлага худалдаан дээр 855 мянган ам.долларт хүрчээ. Эдгээр чулууг ЗХУ-ын нэрийн өмнөөс Зөвлөлтийн сансрын хөтөлбөрийн захирал Сергей Королевын бэлэвсэн эхнэр Нина Королевад бэлэглэж байжээ. Тэрбээр 1993 онд Sotheby”s корпорацад эдгээр чулуунуудаа зарсан нь харь ертөнцийн зүйлийг зарсан анхны тохиолдол болж түүхэнд тэмдэглэгджээ.
Стивен Хокингийн тэргэнцэр
Суут эрдэмтэн Стивен Хокингийн хамгийн анхны тэргэнцэр энэ оны арваннэгдүгээр сард цахим дуудлага худалдаагаар 393 мянган ам.долларт хүрчээ. Үүнээс олсон мөнгийг Стивен Хокингийн сан болон Хөдөлгөөний нейроны өвчний эсрэг холбоонд шилжүүлжээ. Энэхүү тэргэнцрийг эрдэмтэн асан 1960-аад оноос тэргэнцрээ өөрийн гараар явуулж чадахгүй болтлоо буюу 1990-ээд оны эхэн үе хүртэл хэрэглэж байжээ.
Цул очир эрдэнийн бөгж
Цул очир эрдэнээр Apple компанийн ахлах дизайнер Жони Ивийн хийсэн бөгж 256 мянган ам.доллараар энэ сард зарагджээ. Энэхүү очир эрдэнэ 2000-3000 талсттай нь урьд өмнө гарч байгаагүй олон талсттай очир эрдэнэ гэнэ. Дуудлага худалдаанаас олсон мөнгийг дуучин Боногийн үүсгэн байгуулсан ДОХ-ын эсрэг буяны санд хандивлажээ.
5,655 карат маргад эрдэнэ
Аравдугаар сард Замби улсад олборлосон 5,655 карат маргад эрдэнэ Сингапурт өнгөрсөн сард болсон дуудлага худалдааны үеэр 28.4 сая ам.долларт хүрчээ. 1.1 гаруй кг жинтэй энэхүү эрдэнийн чулуу онцгой тунгалаг, төгс алтан ногоон өнгөтэй. Гэхдээ энэхүү чулуу Замби улсад олдсон хамгийн том нь биш аж. 2010 онд тус улсад 6,225 карат маргад эрдэнийн чулуу олж байжээ. Аварга том эрдэнийн чулууг “заан” гэж нэрлэсэн байна.
1.1 сая ам.долларын виски
Аравдугаар сард Шотландад нэгэн ховор виски 1.1 гаруй сая ам.долларын үнэд хүрчээ. 60 жил хадгалагдсан Macallan Valerio Adami 1926 виски дуудлага худалдаагаар хамгийн үнэд хүрсэн вискигээр бүртгэгдэж, дээд амжилтыг тогтоогоод байна. Жаран жилийн өмнө хязгаартай буюу 24 шилийг үйлдвэрлэсэн вискиний нэг нь гэнэ.
Винни Пухийн газрын зургийн эх хувь
Винни Пух баавгайн газрын зургийн эх хувь 600 мянган ам.доллараар зарагдаж, ба нэгэн дээд амжилтыг тогтоожээ. 1926 онд зурсан энэхүү зураг хүүхдийн уран зохиолын хамгийн алдартай газрын зураг юм. Пухийн адал явдал өрнөдөг газруудын байршлыг харуулснаараа энэхүү зураг онцгой юм.
Үлэг гүрвэлийн араг яс
150 сая жилийн настай үлэг гүрвэлийн араг яс зургадугаар сард Парис хотноо зохион байгуулсан дуудлага худалдаан дээр 2.36 сая ам.доллараар зарагджээ. 2.6 метр өндөр, есөн метр урт үлэг гүрвэлийн араг яс маш сайн хадгалагджээ.
Эйффелийн цамхгийн шат
Эйффелийн цамхгийн шатны нэг хэсэг 1991 мянган ам.долларын үнэд хүрчээ. 25 шат бүхий спираль хэлбэртэй энэхүү шат нэгэн цагт алдарт цамхгийн хоёр болон гуравдугаар давхрыг холбох үүрэг гүйцэтгэж байжээ. 1983 онд Эйффелийн цамхагт цахилгаан шатуудыг суурьлуулсанаар явган шат хэрэглээнээс гарсан байна.
Я.БОЛОР
Холбоотой мэдээ
1.jpg)
Сэтгэгдэл ( 0 )