УИХ-ын гишүүн Б.Ундармаагийн эд хөрөнгийг БИТҮҮМЖЛЭХИЙГ шаардлаа

Капитал банканд 20 сая төгрөгөөс дээш хадгаламжтай иргэд Хохирогчдын эрх ашгийг хамгаалах “Шударга” төвтэй  хамтран ТҮР ХОРОО байгуулж, өнөөдөр  /2019.04.10/  10.00 цагаас Монголбанкны гадаа жагсаал зохион байгууллаа. Капитал банк дампуурсантай холбоотойгоор хадгаламж эзэмшигчдийн эрх ашигт асуудал үүсээд байна гэх мэдээллийг  тэд өгч байна. Тиймээс Монголбанк болон АТГ-т шаардлага хүргүүлж буй гэлээ.

Хохирогчдын эрх ашгийг хамгаалах “Шударга” төвийн тэргүүн Х.Оюунцэцэг хэлэхдээ Капитал банкинд 20 сая төгрөгөөс дээш хадгаламжтай 800 гаруй харилцагч байгаа гэсэн мэдээлэл бий. Тэдгээр хүмүүсийн хадгаламжийн дүн 42 тэрбум гэж байгаа. Хадгаламж эзэмшигчид энэ мөнгөө ямар арга замаар олж авах вэ гэдэг нь тодорхой бус байна. УИХ-ын гишүүн Б.Ундармаа Капитал банкны 99.7 хувийг эзэмшдэг. Энэ хүний нэр дээр дэлгүүр, ББСБ, барилгын  компани гэхчлэн 26 том компани байгаа. Хадгаламж эзэмшигчдийг хохиролгүй болгох үүднээс Б.Ундармаагийн компаниудыг, хөрөнгийг битүүмжлэх хэрэгтэй гэж үзэж байна.

Капитал банкинд Нийгмийн даатгалын сангийн мөнгө, Хөдөлмөр эрхлэлтийн сангийн мөнгө гэхчлэн дандаа төрийн мөнгөнүүдийг байршуулж байсан байна. Гэтэл одоо зээлийнх нь 80 хувь чанаргүй гэж байна. Төрийн мөнгийг байршуулаад тэр нь эргээд улс төрийнхөнд ашиглагддаг байсан уу гэдэг асуудлыг шалгах хэрэгтэй. 208 тэрбум төгрөгийн чанаргүй зээл гэж үүссэн гэж байна. Тэгвэл энэ чанаргүй зээлийн хэдэн хувь нь хэрэглээнийх, хэдэн хувь нь бизнесийнх, хэдэн хувь нь улс төрчдийнх байгааг тодорхой гаргаж ир. Зээлийн барьцаа хөрөнгө юу байгааг тодорхой болго. 380 тэрбумын алдагдалтай гэж байгаа. Ийм алдагдалд хүрэхэд улс төрийн нөлөө байсан гэж харагдаж байгаа.

“Алтжин” группийн Г.Алтан Капитал банкнаас сүүлийн нэг сард  олон тэрбумын хадгаламжаа эргүүлэн татахдаа олон иргэний нэр дээр зориуд данс үүсгэж, мөнгөө байршуулсан гэх асуудал байна. Г.Алтанг АТГ-т шалгуулахаар хандаж байна. 

Капитал банкны үйл ажиллагаа 2015 оноос эхэлж доголдсон юм бол Монголбанк ямар нэг арга хэмжээ авч байсан уу. Банкны хувь эзэмшлийг, активыг бүрэн тодорхой болгож мэдээлэхийг шаардаж байна” гэлээ.

20 сая төгрөгөөс дээш хадгаламжтай иргэдийн Түр хорооноос ийм мэдээллийг өгч байна.

ХОРИН САЯ ТӨГРӨГӨӨС ДЭЭШ ДҮНТЭЙ ХАДГАЛАМЖ ЭЗЭМШИГЧИД НЭХЭМЖЛЭЛ ГАРГАНА

Тэгвэл Хадгаламжийн даатгалын корпораци 20 сая төгрөгөөс дээш хадгаламжтай харилцагчдад зориулж дараах мэдээллийг өгч байгаа юм.

-Даатгагдаагүй харилцагчдын мөнгийг ямар байдлаар олгох вэ?

-Даатгагдаагүй хадгаламж эзэмшигчид банкны эрх хүлээн авагчид нэхэмжлэл гаргана. Банкин дахь мөнгөн хадгаламжийн даатгалын тухай хуулиар даатгагдсан 20 сая хүртэл төгрөгийн харилцах, хадгаламжийг Хаан банкинд таны нэр дээр шилжүүлсэн. 20 сая төгрөгөөс дээш дүнтэй хадгаламж эзэмшигчдийн 20 сая төгрөгөөс давсан мөнгийг банкны эрх хүлээн авагч Капитал банкны зээлийн эргэн төлөлт, хөрөнгийн борлуулалтын орлогоос Банкны тухай хуульд заасан дарааллын дагуу барагдуулна.

-Мөнгөө олж авах хүртэлх хугацааны хүүг өгөх үү?

-Үгүй. Даатгагдаагүй харилцах болон хадгаламжийн дансанд банкийг албадан татан буулгах шийдвэр гарсан өдрөөс эхлэн хүү тооцогдохгүй. Банкны тухай хуулийн дагуу банкинд эрх хүлээн авагч томилсон бол банкийг албадан татан буулгах шийдвэр гарснаас хойших хугацаанд банкны гүйцэтгээгүй мөнгөн төлбөрийн үүрэгт хүү, алданги, торгууль тооцохгүй. Харин даатгагдсан дүн Хаан банк руу шилжсэн өдрөөс эхлэн шинэчлэн байгуулах гэрээний дагуу хүү хуримтлагдаж эхэлнэ.

-Үлдэгдлээ яаж тулгаж баталгаажуулах вэ?

-Банкны эрх хүлээн авагчид хандсанаар мэдээлэл авах боломжтой.

-Мөнгөө шууд авч болохгүйн шалтгаан нь хуулийн  үндэслэлтэй юу?

-Хадгаламжийн даатгалын хуулиар зөвхөн 20 сая хүртэл төгрөгийг даатгасан. Үлдэгдэл мөнгийг Банкны тухай хуульд заасан дарааллын дагуу барагдуулна.

-Даатгагдаагүй хадгаламжийн төлбөрийг ямар дарааллаар барагдуулах вэ. Нэхэмжлэл өгөх үү?

-Банкны тухай хуулийн 73 дугаар зүйлд зааснаар даатгагдаагүй хадгаламжийн төлбөр төлбөр барагдуулах дарааллын 5 дугаарт орно. Тус хуулийн 71 дүгээр зүйлд зааснаар нэхэмжлэл хүлээн авах тухай зарласнаас 60 хоногийн дотор банкны эрх хүлээн авагчид нэхэмжлэл гаргана.

-Банкны эрх хүлээн авагчтай холбогдох утасны дугаар хэд вэ?

-Татан буугдсан банкны 1800-1912 лавлах утсаар холбогдоно.

-Банкинд гаргасан нэхэмжлэлийн шаардлагыг шийдвэрлэхэд хэр их хугацаа зарцуулагдах вэ?

-Банкны эрх хүлээн авагч нь банкнаас үүргийн гүйцэтгэлийг шаардах эрх бүхий этгээдийн нэхэмжлэлийг хүлээн авах хугацааг мэдэгдэл гаргаснаас хойш 60 хоног байхаар тогтоож, томилогдсон өдрөөс хойш хоёр сарын дотор банкны санхүүгийн тайлан, данс мэдээлэлд бүртгэгдсэн үүргийн гүйцэтгэлийг шаардах эрх бүхий этгээдэд мэдэгдэж, олон нийтэд мэдээлнэ. Банкны тухай хуулийн 71 дүгээр зүйлийн 71.2 дахь хэсэгт зааснаар нэхэмжлэл хүлээн авах эцсийн хугацаа өнгөрснөөс хойш 90 хоногийн дотор банкны эрх хүлээн авагч дараах шийдвэрийг гаргана. Үүнд:

•       Нэхэмжлэлийн шаардлага хүчин төгөлдөр эсэхэд үндэслэл бүхий эргэлзээ байвал шаардлагыг хүлээн авахаас татгалзах;

•      Банкнаас үүргийн гүйцэтгэлийг шаардах эрх бүхий этгээдийн шаардлагын хэмжээг тодорхойлж, энэ хуульд заасны дагуу нэхэмжлэлийн дарааллыг тогтоох;

•       Банкийг албадан татан буулгах үүднээс банкны эрх хүлээн авагчийн цалин хөлс, зээлдүүлэгчийн нэрс, баталгаажсан нэхэмжлэл бүрийн үнийн дүн болон төлөх төлбөрийн нийт дүнг тусгасан татан буулгах арга хэмжээний төлөвлөгөө батлах;

•       Нэхэмжлэлийн шаардлага болон түүний баталгаажсан хэмжээний талаар нэхэмжлэгч этгээдэд мэдэгдэх.

Банкны эрх хүлээн авагч төлбөрийг татан буугдах банкны хөрөнгийн борлуулалт, зээлийн эргэн төлөлтөөс Банкны тухай хуулийн 73 дугаар зүйлд заасан дарааллын дагуу шийдвэрлэнэ.

Банкийг татан буулгахаас өмнө иргэний шүүхэд банкийг хариуцагчаар татан, нэхэмжлэл гаргасан байсан бол яах вэ?

Банкинд холбогдох иргэний хэрэг хянан шийдвэрлэх ажиллагааг Иргэний хэрэг шүүхэд хянан шийдвэрлэх тухай хуулийн 80.1.1-т заасны дагуу түдгэлзүүлнэ.