Л.Пүрэвбаатар УБТЗ-ын хууль ёсны ашиг сонирхолд халдаж байна гэв

Б.Гантуяа | Zindaa.mn
2019 оны 04 сарын 15

Монгол-Оросын хувь нийлүүлсэн нийгэмлэг Улаанбаатар төмөр замаас өнөөдөр /2019.04.15/ тус газрын даргаар ажиллаж байсан иргэн Л.Пүрэвбаатарын хууль бусаар эзэмшиж буй нэг тэрбум 484 сая төгрөгийн үнэ бүхий албаны орон сууцны асуудлаар мэдээлэл хийлээ.

Уг хурлаар, УБТЗ хувь нийлүүлсэн нийгэмлэгийн даргаар ажиллаж байсан Л.Пүрэвбаатар нь 2014 арванхоёрдугаар сард төмөр замын удирдах байгууллага буюу ТУЗ-ын шийдвэрээр төмөр замын даргаар томилогдсон байдаг. Томилогдсон өдрөө ажил олгогч буюу ерөнхий хороотой контрактын гэрээ байгуулалгүйгээр тухайн үеийн Төрийн өмчийн хорооны даргын үүргийг түр орлон гүйцэтгэгч н.Цогтбаатар гэдэг хүнтэй контракт гэрээг хууль бусаар байгуулсан. Энэ хүн нь тухайн үед УБТЗ-ыг төлөөлөх эрхгүй этгээд байсан. Уг хууль бус гэрээнд зааснаар УБТЗ-ын хөрөнгөөр өндөр үнэ бүхий хаус авч өгөх заалт үндэслэн ашиг сонирхол бүхий хувийн барилгын компанитай гэрээ хийн 1.5 тэрбум төгрөгөөр хаус худалдаж авсан байдаг.

1.Анх байгуулсан контракт гэрээг эрхгүй этгээдтэй байгуулсан

2. Ашиг сонирхлын зөрчилтэй компанитай худалдан авах гэрээ байгуулсан

3.УБТЗ-ын хөрөнгөөр зохих байгууллагын зөвшөөрлийг авалгүйгээр төлбөрийн мөнгийг нэг дор шилжүүлж авсан гэх мэт хууль бус үндэслэлүүд байсан.

Орон сууц худалдан авах гэрээг Л.Пүрэвбаатар нь албан тушаалд томилогдсоноосоо хорь хоногийн дотор өөрийнхөө гарын үсгээр баталгаажуулан хийжээ. Албан тушаалаа аваад ажил албатайгаа танилцаж амжаагүй байхдаа ийнхүү орон сууцны гэрээ хийсэн нь УБТЗ-ын хууль ёсны ашиг сонирхолд ноцтой халдсан гэж үзэж байна хэмээн УБТЗ-ын Хуульзүйн албаны хуулийн зөвлөх Х.Энхсүх хэллээ.  

Түүнчлэн Л.Пүрэвбаатарыг ажил үүргээ хангалттай биелүүлж чадаагүй гэх үндэслэлээр албан ажлаас нь чөлөөлсөн боловч тэрбээр УБТЗ-ын хөрөнгөөр худалдан авсан орон сууцаа чөлөөлж өгөөгүйгээс үүдэн уг хэргийг шүүхээр шийдвэрлүүлэхээр болжээ. Улмаар  2018 оны нэгдүгээр сард Хан-Уул дүүргийн иргэний хэргийн анхан шатны шүүхээр уг хаусыг Л.Пүрэвбаатарын эзэмшлийнх мөн гэдэг шийдвэр гаргасныг УБТЗ-аас эсэргүүцэн, давж заалдах шатны шүүхэд хандсан байна. Ингээд Нийслэлийн давж заалдах шатны шүүх болон Улсын Дээд шүүхээс дээрх хаус нь УБТЗ-ын өмч хөрөнгө мөн гэдгийг тогтоон хэргийг эцэслэн шийдвэрлэсэн байдаг. Гэвч Л.Пүрэвбаатар нь шүүхээр нэгэнт эцэслэгдсэн уг хэргийг Баянгол болон Хан-Уул дүүргийн шүүхэд дахин нэхэмжлэл гарган Улсын Дээд шүүхийн тогтоолын эсрэг ажиллаж эхлээд байна гэсэн юм. Иймд УБТЗ-ын зүгээс Үндэсний аюулгүй байдлын зөвлөлд хандахаар болжээ.

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top