“Их-20” бүлгийн дээд хэмжээний уулзалт өнөөдөр /2019.06.28/ Японы Осака хотноо төлөвлөсөн цагаас бага зэрэг хойшилж эхэллээ. Учир нь ОХУ, Өмнөд Африкийн Бүгд Найрамдах Улсын ерөнхийлөгч Владимир Путин, Сирил Рамафоса нарын хоёр талын уулзалт удааширсан байна.

Хурал эхлэхээс өмнө уламжлалт ёсоор дэлхийн тэргүүлэгч 20 улсын төрийн тэргүүн нар гэрэл зургаа татуулжээ. Протокол ёсоор эхний эгнээний голд уулзалтыг зохион байгуулагч, Японы улсын Ерөнхий сайд Абэ Шинзо, түүний баруун талд өмнөх уулзалтыг зохион байгуулсан Аргентины Ерөнхийлөгч Маурисио Макри, зүүн талд нь 2020 онд “Их-20” бүлгийн дээд хэмжээний уулзалт болох Саудын Арабын хунтайж Мохаммед бин Салман нар зогсжээ. Гэрэл зураг татуулахаас өмнө АНУ-ын Ерөнхийлөгч Доналд Трамп, БНХАУ-ын дарга Ши Жинпинь нар бие биетэйгээ мэндчилэв. Тэд маргааш буюу бямба гарагт дэлхийн нийтийн анхаарлыг татаж буй хоёр талын уулзалт хийх юм.

Дээд хэмжээний уулзалтын хүрээнд сангийн сайд нарын болон төв банкны тэргүүн нарын уулзалт, гадаад хэргийн сайд нарын уулзалт болон бусад салбарын сайд нарын түвшний уулзалтууд Японы есөн хотод болох юм.

“Их-20” бүлгийн дээд хэмжээний уулзалтаар хэлэлцэх дараах таван гол асуудал дэлхийн нийтийн анхаарлыг татаж байна.

ХУДАЛДААНЫ ДАЙН

“Их-20” бүлгийн дээд хэмжээний уулзалтаас ч илүү олны анхаарлыг татаж буй Доналд Трамп, Ши Жинпинь нарын уулзалт маргааш /2019.06.29/ болох бөгөөд энэ уулзалтаар дэлхийн эдийн засгийн хөгжлийг хойш нь чангааж буй худалдааны дайныг шийдвэрлэхэд дэвшил гаргана хэмээн дэлхийн нийт найдлага тавьж байгаа.

ДЭЛХИЙН ЭДИЙН ЗАСАГ

АНУ-ын Төв банк бодлогын хүүг бууруулах дохио өгч, худалдааны нөхцөл байдал хурцадсанаас үүдэлтэй дэлхийн эдийн засгийн өсөлтийг удаашрал бодлого боловсруулагчдын толгойны өвчин болоод байна. Энэ нь долларын ханшийг сулруулж буйгаас гадна Европын төв банк болон Японы төв банканд валютын ханшийг тогтвортой барих арга зам эрэлхийлэх шахалт болж байгаа билээ. Абэ Шинзо уулзалтын үр дүнгээр гарах хамтарсан мэдэгдэлд чөлөөт худалдааны асуудлыг тусгахаар найдаж буй бол Трампын зүгээс үүнийг хүчтэй эсэргүүцэж, протекционист бодлогоос залсхийх амлалтаасаа ухрахыг “Их-20” бүлгийн гишүүн орнуудаас шаардаж байгаа билээ.

УУР АМЬСГАЛЫН ӨӨРЧЛӨЛТ

Дэлхийн дулааралтай тэмцэх асуудал маргаан дагуулсан хэвээр. Уур амьсгалын өөрчлөлттэй тэмцэх чиглэлээр шийдэмгийн арга хэмжээ авах Европын холбооноос тавьж буй шаардлагыг АНУ хүчтэй эсэргүүцэж байгаа. “Их-20” хамтарсан мэдэгдлийн төслийн эцсийн хувилбарт 2015 оны Парисын гэрээг дэмжих заалт орсон бөгөөд өмнөх хувилбарт энэ заалтыг АНУ-ын шаардлагаар хассан байсан юм. Францын Ерөнхийлөгч Эммануэлл Макрон Парисын гэрээг тусгаагүй хамтарсан мэдэгдэлд гарын үсэг зурахгүй хэмээн мэдэгдэж байсан. Дэлхийн дулаарлыг “заль мэх” гэж үздэг Трамп Парисын гэрээнээс АНУ-ыг 2017 онд гаргасан юм.

ИРАН БА ГАЗРЫН ТОС

Хэдийгээр Иран улс “Их-20” бүлгийн гишүүн орон биш ч Персийн буланд нөхцөл байдал хурцдаж, АНУ Ираны эсрэг дайн эхлүүлнэ хэмээн сүрдүүлээд байгаа. Үүнтэй зэрэгцээд газрын тосны зах зээл тодорхойгүй байдалд ороод байна. Учир нь ОПЕК газрын тосны үйлдвэрлэлийг бууруулах эсэх тал дээр шийдвэр гаргах эцсийн хугацаа тулж ирээд байгаа билээ. Энэ асуудал Владимир Путих, Саудын Арабын угсаа залгамжлах хунтайж Мохаммед бин Салманы хоёр талын уулзалтын гол асуудал байх юм.

ДАЛАЙН БОХИРДОЛ

Далайг хуванцар хог хаягдлаар бохирдуулах асуудал дээр дэлхийн тэргүүлэгч хорин улс орон дэвшил гаргаж чадна гэдэгт ажиглагчид итгэж байна.