Нийгмийн даатгалын санхүүгийн ажилтнуудын сургалт болж байна

Нийгмийн даатгалын ерөнхий газар нь Азийн хөгжлийн банкны санхүүгийн дэмжлэгтэйгээр Нийгмийн даатгалын салбарын ажилтнуудыг чадавхжуулах сургалтыг өргөн хүрээнд, системтэй зохион байгуулж байна. Энэ хүрээнд салбарын санхүүгийн ажилтнуудыг чадавхжуулах сургалт гурав дахь өдрөө үргэлжилж байна. Сургалтад нийгмийн даатгалын төв орон нутгийн байгууллагын нягтлан бодогч, мэргэжилтнүүдээс бүрдсэн 137 санхүүгийн ажилтан, албан хаагч оролцож байгаа юм.

Нийгмийн даатгалын ерөнхий газрын дэд дарга Г.Саран сургалтын үеэр хэлсэн  үгэндээ “Бид энэ жил 1.4 их наяд төгрөгийн орлого хуримтлуулж, 1.7 их наяд төгрөгийн зарлагыг санхүүжүүлээд байна. Өөрөөр хэлбэл өнгөрсөн жилийнхээс орлого 36.4 хувиар, зарлага 21 хувиар тус тус өсчээ. Нийгмийн даатгалын салбарын санхүүгийн ажилтнууд нь хууль тогтоомжийн биелэлтийг зохион байгуулах, тэр дундаа нийгмийн даатгалын санг бүрдүүлж, орлого, зарлагын гүйцэтгэлийг хангах, даатгуулагчдад тэтгэвэр, тэтгэмжийг хуульд заасан хугацаанд олгоход онцгой үүрэгтэй ажилладаг. Иймд салбарын санхүүг хариуцан ажиллаж буй та бүхэн мэдлэг, ур чадвараа сайжруулж, хяналт, хариуцлагатай ажиллахад онцгой анхаарах хэрэгтэй” гэсэн юм.

Сургалтаар Төрөөс нягтлан бодох бүртгэлийн талаар баримтлах бодлого, Төсвийн бодлого чиглэл,  Нягтлан бодох бүртгэлийн олон улсын стандарт болон Нийгмийн даатгалын салбарын нягтлан бодох бүртгэлийн бодлогын хэрэгжилт, салбарын хууль тогтоомжийн өөрчлөлт, програм хангамжийн шинэчлэлийн талаар мэргэжил арга зүйн зөвлөгөө өгч буй нь оролцогчдын мэдлэгийг дээшлүүлэхэд ихээхэн ач холбогдолтой юм.