Ц.Ганцэцэг: Ирэх 2024 оноос 60 сарын цалингийн дундажаар тэтгэврийг тогтооно

Ирэх 2024 оны нэгдүгээр сарын 1-нээс хэрэгжиж эхлэх “Нийгмийн даатгалын багц хууль”-ийн шинэчилсэн найруулгын тухай Нийгмийн даатгалын ерөнхий газрын даргын албан үүргийг Түр орлон гүйцэтгэгч Ц.Ганцэцэгтэй ярилцлаа.

-Нийгмийн даатгалын багц хуулийн шинэчилсэн найруулгыг 2024 оны нэгдүгээр сарын 1-нээс мөрдөнө. Багц хуулийн шинэчлэлийн үндсэн агуулгын талаар ярилцъя?

-Анх 1994 онд “Нийгмийн даатгалын багц хууль”-ийг УИХ-аас батлан 1995 оноос эхлэн мөрдөж байна. Энэхүү хуулиар даатгуулагч бүр хөдөлмөрийн хөлс, түүнтэй адилтгах орлогоосоо тодорхой хувь хэмжээгээр шимтгэл төлж, сан бүрдүүлэх, нийгмийн шинжтэй эрсдэл (өндөр наслах, хөдөлмөрийн чадвараа алдах, хүүхэд төрүүлэх, ажилгүй болох, нас барах)-д өртөх үедээ уг сангаас төлсөн шимтгэл, авч байсан цалин хөлстэйгээ уялдаатай тэтгэвэр, тэтгэмж авах агуулга бүхий нийгмийн даатгалын тогтолцоог шинээр бүрдүүлсэн нь нийгмийн хамгааллын салбарт хийгдсэн томоохон шинэчлэлийн нэг болсон. Өнөөдрийн байдлаар 55.4 мянган ажил олгогч, 1 303.5 мянган хүн нийгмийн даатгалд даатгуулж, санд 4.175.2 тэрбум.төгрөгийн орлого төвлөрч, жилд дунджаар давхардсан тоогоор 761.2 мянган хүний тэтгэвэр, тэтгэмж, төлбөрт 4152.7 тэрбум төгрөг олгож байна. “Нийгмийн даатгалын тухай хууль” батлагдсанаас хойш нийгмийн даатгалын хамрах хүрээг өргөтгөх, үйлчилгээний нэр төрлийг нэмэгдүүлэх, шимтгэлийн хувь хэмжээг өөрчлөх, нийгмийн даатгалын удирдлагын тогтолцоог боловсронгуй болгох зэрэг ажил олгогчид, даатгуулагчид, нийгмийн даатгалын үйлчилгээ авагчдад чиглэсэн 31 удаа нэмэлт, өөрчлөлт орсон.

Хүн амын насжилттай уялдуулан сангуудын зөв менежментийг хэрэгжүүлэх, зарим салбарын хууль тогтоомжид нийгмийн даатгалын шимтгэл төлөх, тэтгэвэр тогтоох харилцааг зохицуулж байгааг хууль эрхзүйн нэг орчинд оруулах, хөдөлмөрийн харилцааны хэв шинж өөрчлөгдөж байгаатай холбогдуулан нийгмийн даатгалын хамрах хүрээ, тухайлбал, хүн амын онцлог бүлэг болох малчид, хувиараа хөдөлмөр эрхлэгчдийн нийгмийн даатгалын хамралтыг нэмэгдүүлэх, шимтгэл ногдуулан төлөх орлогын бүрэлдэхүүнийг нарийвчлан тодорхойлох, нийгмийн даатгалын үйлчилгээг бүрэн цахимжуулах, засаглалыг сайжруулах, тэтгэврийн хуваарилалтын тогтолцооноос хагас хуримтлалын тогтолцоонд шилжих, нийгмийн даатгалын сангийн ирээдүйн алдагдлыг бууруулах, нэрийн дансны хийсвэр бүртгэлийг мөнгөжүүлж бодит хуримтлалыг эхлүүлэх зэрэг үндэслэл шаардлагааар Нийгмийн даатгалын багц хуулийн шинэчилсэн найруулга батлагдсан.

-Нийгмийн даатгалын ерөнхий хуулийн шинэчлэлийн гол гол зохицуулалтуудаас мэдээлэл өгнө үү.

-Нийгмийн даатгалын харилцааг салбарын олон хуулиудаар зохицуулж байгааг өөрчилж, зөвхөн нийгмийн даатгалын хууль тогтоомжоор зохицуулахаар боллоо. Шинэчлэлийн үндсэн үзэл баримтлал нь хуваарилалтын зарчмаас хуримтлалын тогтолцоонд үе шаттайгаар шилжих явдал гэж ойлгож байгаа. Тухайлбал, даатгуулагчийн нэрийн дансны хийсвэр бичилтийг үе шаттайгаар мөнгөжүүлж, даатгуулагч өөрийн мөнгийг санхүүгийн хэрэгсэлд оруулах сонголтоо хийх, мөнгөжүүлсэн орлогыг нь өвлүүлэх, Хуримтлалын нэгдсан сангийн тухай хуулийн хүрээнд мөнгөжүүлсэн орлогоо эрүүл мэнд, боловсрол, орон сууцны ипотекийн санхүүжилтэд ашиглах эрхзүйн орчныг бүрдүүллээ. Түүнчлэн нийгмийн даатгалын шимтгэл ногдуулах орлогын бүрэлдэхүүнийг нарийвчлан тодорхойлох, сангийн чөлөөт үлдэгдлийг санхүүгийн найдвартай хэрэгсэлд оруулж өсгөн нэмэгдүүлэх, Нийгмийн даатгалын үндэсний зөвлөлийн дэргэд эрсдэлийн удирдлага, актуар тооцоолол хийх, хөрөнгө оруулалт, аудитын орон тооны бус Мэргэжлийн хороод ажиллах, нийгмийн даатгалын сангийн хөрөнгийг санхүүгийн хэрэгсэлд оруулах үйл ажиллагаанд Олон нийтийн хяналтын зөвлөл хяналт тавих, мэргэжил аргазүйгээр хангах, мэдээллийн нэгдсэн цахим сантай болсноор нийгмийн даатгалын үйлчилгээ бүрэн цахимжих зэрэг асуудлуудыг хуульчилсан.

-Нийгмийн даатгалын хамралт сайжирах уу?

-Хуульд нийгмийн даатгалын хамрах хүрээг даатгалын төрөл бүрээр нарийвчлан тодорхойлсон. Тухайлбал, аж ахуйн нэгж, байгууллагын ажилтан нийгмийн даатгалын бүх төрөлд, хүүхдээ асарч байгаа эх зөвхөн тэтгэврийн, тэтгэмжийн даатгалд, үйлдвэрлэлийн ослын улмаас хөдөлмөрийн чадвараа алдсан тэтгэвэр авагч зөвхөн тэтгэврийн даатгалд, ажил гүйцэтгэх гэрээ, хөлсөөр ажиллах гэрээ болон тэдгээртэй адилтгах гэрээгээр гээр ажиллаж байгаа ажилтан зөвхөн тэтгэвэр, тэтгэмжийн даатгалд, ажил хөдөлмөр эрхэлж байгаа ахмад настан тэтгэврийн, тэтгэмжийн, үйлдвэрлэлийн осол, мэргэжлээс шалтгаалсан өвчний даатгалд, үүнээс тэтгэврийн даатгалд даатгуулах эсэхээ өөрөө сонгох боломжтой гэх зэргээр нарийвчлан тодорхойлсон.

-Зарим иргэний шимтгэлийг төрөөс төлөх зохицуулалт орсон. Энэ талаар тодорхой тайлбар өгнө үү.

-Эмнэлгийн хяналтад байдаг, байнгын асаргаа шаардлагатай 18 хүртэлх насны хөгжлийн бэрхшээлтэй хүүхдээ асарч байгаа сайн дураар даатгуулагч эх/эцэг/-ийн тэтгэврийн даатгалын шимтгэлийг төр хариуцаж улсын төсвөөс сар бүр төлөхөөр болж байна. Мөн сайн дураар даатгуулагч малчин, туслах малчны тав хүртэлх жилийн тэтгэврийн даатгалын шимтгэлийн 50 хувийг төр хариуцан улсын төсвөөс төлнө. Эдгээр иргэдийн шимтгэлийг хөдөлмөрийн хөлсний доод хэмжээнээс тооцон улсын төсвөөс нийгмийн даатгалын санд төлөх юм. Жишээ нь, малчин 18 жил сайн дураар даатгуулж шимтгэлээ төлсөн бол түүний хоёр жилийн төлөх шимтгэлийн 50 хувийг төрөөс төлнө гэсэн үг л дээ. Өөрөөр хэлбэл, нийгмийн даатгалд сайн дураар даатгуулж байгаа хөгжлийн бэрхшээлтэй хүүхдээ асарч байгаа эх/эцэг, малчдыг урамшуулж ирээдүйд нийгмийн даатгалын сангаас тэтгэвэр авах, нийгмийн баталгааг нь хангах нөхцөл бүрдэж байгаа юм.

-Нэрийн дансны орлогыг мөнгөжүүлэх, даатгуулагч өөрт хэрэгцээтэй зүйлд зарцуулах, өвлүүлэх талаар Нийгмийн даатгалын ерөнхий хуульд зохицуулалт орсон байна. Энэ талаар ярилцъя.

-2022 оны байдлаар 1.5 сая даатгуулагч “тэтгэврийн даатгалын шимтгэлийн нэрийн данс” нээлгэж, төлсөн шимтгэл, хүүгийн хэмжээ (нийт дүнгээр 27.3 их наяд.төг)-г хийсвэрээр бүртгэн дүнг даатгуулагчдад жил бүр мэдээлж байна. Нийгмийн даатгалын ерөнхий хуулийн тавдугаар зүйлийн 5.1.4-т тэтгэврийн хуваарилалтын тогтолцооноос хуримтлалын тогтолцоонд шилжих бодлогод тулгуурласан байхаар нийгмийн даатгалын зарчмыг тодорхойлсон. Энэ зарчмын хүрээнд даатгуулагчийн нэрийн дансанд бүртгэсэн орлогыг үе шаттайгаар мөнгөжүүлэх зохицуулалт орсон. Одоогийн хуваарилалтын тогтолцоо нь шимтгэл төлөгчдийн төлсөн шимтгэлээс сан бүрдэж, эргээд уг сангаас тэтгэвэрт зарцуулж байгаа. Хуваарилалтаас хуримтлалын тогтолцоонд шилжих зорилгоор 2024 оноос эхлэн нэрийн дансны орлогыг Ирээдүйн өв сангийн тухай хуульд зааснаар улсын төсөвт шилжүүлэх орлогоос болон улсын төсвөөс мөнгөжүүлэх, мөнгөжүүлсэн хөрөнгийг тэтгэврийн нөөц санд байршуулах, тэтгэврийн нөөц санг тэтгэврийн даатгалд ажил олгогч, даатгуулагчийн төлж байгаа хоёр хувийн шимтгэлийн болон дээр дурдсан мөнгөжүүлсэн орлогоос бүрдүүлэхээр заасан. Энэхүү мөнгөжүүлсэн орлогыг даатгуулагч бүрээр бүртгэж, даатгуулагчийн саналыг харгалзан санхүүгийн хэрэгсэлд хөрөнгө оруулж өсгөх, эсхүл даатгуулагч эрүүл мэнд, боловсрол, орон сууцны ипотекийн санхүүжилтдээ зарцуулах нөхцөл бүрдэж байгаа. Мөн даатгуулагч нас барвал түүний мөнгөжүүлсэн орлогыг хууль ёсны өв залгамжлагчид нь өвлүүлэх юм. Эдгээр зохицуулалт 2030 оноос хэрэгжиж эхэлнэ.

-Нийгмийн даатгалын сангаас олгох тэтгэврийн тухай хуулиар ямар өөрчлөлтүүд орсон бэ?

-Тэтгэврийн тогтолцоонд өөрчлөлторж байгаа. Өөрөөр хэлбэл, олон давхаргад тэтгэврийн тогтолцоонд шилжинэ. Даатгуулагч одоогийн тэтгэврийн даатгалын сангаас тэтгэвэр авахаас гадна Хувийн нэмэлт тэтгэврийн тухай хуульд зааснаар нэмэлт тэтгэвэр авах боломж бүрдэж байна.

-Өндөр насны тэтгэврийн нас хэвээрээ юу. Тэтгэвэр бодох аргачлал, хувь хэмжээнд өөрчлөлт орсон уу. Таван жилийн дундаж цалингаас тэтгэвэр тогтоодог болох нь. Урд нь 6, 7 жилийн дундаж цалингаас бодуулсан хүмүүсийн тэтгэврийг өөрчлөх үү?

-Өндөр насны тэтгэврийн нас хэвээрээ. Олон жил шимтгэл төлж ажилласан даатгуулагч эрэгтэй 60, эмэгтэй 55 нас хүрээд өөрийн хүсэлтээр тэтгэвэр тогтоолгож болно. Эсхүл цаашид ажиллах сонирхолтой хүмүүс төрсөн ондоо харгалзах насандаа хүрээд тэтгэвэр тогтоолгож болно. Өөрөөр хэлбэл, тэтгэврийн насны хувьд ямар нэг өөрчлөлт ороогүй. Тэтгэвэр бодох аргачлалын хувьд цалинд үндэслэсэн, нэрийн дансны аргаар гэсэн одоогийн аргачлал хэвээр байна. Тухайлбал, 1960 он ба түүнэээс өмнө төрсөн даатгуулагч таван жилийн дундаж цалингаас, 1979 он ба түүнээс хойш төрсөн даатгуулагч нэрийн дансны аргаар тэтгэврээ бодуулна. Харин 1960-1979 оны хооронд төрсөн даатгуулагч энэ хоёр аргын аль нэгийг сонгох боломжтой. 2024 оноос эхлэн таван жилийн буюу 60 сарын цалингийн дунджаас тэтгэврийг бодно. Өмнө нь нь 6, 7 жилийн цалингийн дунджаас тэтгэвэр тогтоолгосон иргэдийн тэтгэврийг хүсэлтийг нь үндэслээд таван жилийн цалингийн дунджаас өөрчлөн тогтоох зохицуулалт хуульд орсон байгаа.

-Тэтгэвэр бодох итгэлцүүрийг Засгийн газар шинэчлэн тогтоохоор заасан байна. Итгэлцүүрийг хэрхэн яаж хэрэглэх вэ?

-Итгэлцүүр гэдэг нь өмнөх үеийн цалин хөлс, түүнтэй адилтгах орлогын өнөөгийн үнэ цэнийг тодорхойлох зорилгоор тогтоосон тоон илэрхийлэл юм. Итгэлцүүрийг Засгийн газраас жил бүрийн наймдугаар сарын 1-ний дотор шинэчлэн тогтоож, нийгмийн даатгалын шимтгэл нөхөн төлөх, шинээр тэтгэвэр тогтоолгох иргэдийн цалин хөлсөнд хэрэглэхээр хуульчилсан. Засгийн газрын 2023 оны 238 дугаар тогтоолоор есөн жилийн дараа тэтгэвэр бодох цалинд хэрэглэх итгэлцүүрийг 2022 он суурьтайгаар шинэчлэн тогтоож, уг итгэлцүүрийг баримтлан нийт тэтгэвэр авагчдын тэтгэврийг шинэчлэн бодсон.

-Тэтгэврийг инфляцийн түвшинтэй уялдуулан жил бүр нэмэгдүүлэхээр заасан байна. Энэ талаар тодорхой мэдээлэл өгнө үү.

-Тийм ээ. Хуульд зааснаар тэтгэвэр авагчийн тэтгэврийн хэмжээг өмнөх оны инфляцын жилийн дундаж түвшинтэй уялдуулан жил бүриййн нэгдүгээр сарын 1-ний өдрөөс эхлэн нэмэгдүүлнэ. Засгийн газрын 2023 оны 239 дүгээр тогтоолоор нийгмийн даатгалын сангаас тэтгэвэр авч байгаа болон цэргийн алба хаагчийн тэтгэврийг инфляцийн түвшинтэй уялдуулан 10 хувиар нэмэгдүүлэхээр шийдвэрлэсний дагуу долоодугаар сарын 1-нээс нэмэгдсэн тэтгэврийг олгож байна. Эдгээр арга хэмжээний дүнд бүрэн тэтгэврийн доод хэмжээ 550.0 мян.төг, хувь тэнцүүлсэн тэтгэврийн доод хэмжээ 440.0 мян.төг, дундаж тэтгэвэр 685.6 мян.төгрөгт хүрч, тэтгэвэр дунджаар 24 орчим хувиар нэмэгдсэн.

-Тэтгэврийг өвлүүлэх талаар хуульд тусгагдсан байна. Энэ талаар мэдээлэл өгнө үү.

-Нийгмийн даатгалын сангаас олгох тэтгэврийн тухай хуульд “Өндөр насны тэтгэврийн тусгай зохицуулалт” гэсэн шинэ зүйл нэмэгдсэн. Энэ зохицуулалтын дагуу Гэр бүлийн тухай хуульд заасны дагуу гэрлэлтээ бүртгүүлж, 20 ба түүнээс дээш жил хамт амьдарсан өндөр насны тэтгэвэр авагчийн өндөр насны тэтгэвэр авагч эхнэр/нөхөр нас барсан тохиолдолд нас барсан эхнэр/нөхрийн авч байсан тэтгэврийн 20 хувиар тооцон эхнэр/нөхрийнх нь тэтгэврийн хэмжээг нэмэгдүүлэхээр заасан. Энэ харилцаа нь тэтгэврийг өвлүүлэх агуулгатай юм.

-Хөдөлмөрийн хэвийн бус нөхцөлөөр өндөр насны тэтгэвэр тогтоох нь хэвээрээ юу?

-Одоогийн хууль тогтоомжоор өндөр насны тэтгэвэрт эрт гарах зохицуулалтууд байдаг. Тухайлбал, хөдөлмөрийн хэвийн бус нөхцөл (газрын доор, хортой, халуун, хүнд)-д ажилласан, олон хүүхэд төрүүлж, өсгөсөн, мэргэжлийн урлагийн байгууллагад ажилласан, малчнаар ажилласан зэрэг. Өөрөөр хэлбэл, хуулиар тогтоосон эдгээр нөхцөлийг хангаж байгаа даатгуулагч 60/55 насанд хүрэхгүйгээр насны хувьд 5-10 жилийн өмнө өндөр насны тэтгэвэр тогтоолгох зохицуулалт хэвээрээ, өөрчлөлт ороогүй гэж ойлгож болно.

-Нийгмийн даатгалын сангаас олгох тэтгэмжийн тухай хуульд орсон гол гол шинэчлэлийн асуудлуудын талаар ярилцъя?

-Одоо хүчин төгөлдөр мөрдөж байгаа Нийгмийн даатгалын сангаас олгох тэтгэвэр, тэтгэмжийн тухай хуулиар тэтгэвэр, тэтгэмжийн харилцааг зохицуулж байгаа бол ирэх оноос тэтгэврийн харилцааг Нийгмийн даатгалын сангаас олгох тэтгэврийн тухай хуулиар, богино хугацаатай тэтгэмжүүдийн харилцааг Нийгмийн даатгалын сангаас олгох тэтгэмжийн тухай хуулиар зохицуулна. Энэ хуулиар тэтгэмжийн болон ажилгүйдлийн даатгалын сангаас үзүүлэх үйлчилгээ, даатгуулагч тэтгэмж авах нөцөл, тэтгэмжийн хэмжээ, олгох хугацаа зэрэг нарийвчилсан харилцааг зохицуулна. Хуулийн дагуу тэтгэмж олгоход баримтлах шимтгэл төлсөн байвал зохих хугацааны интервалыг сараар болгож, тэтгэмж бодох хувь хэмжээг нэмэгдүүлсэн тул даатгуулагчийн тэтгэмж авах нөхцөл сайжирна. Ингэснээрээ даатгуулагчийн гарт очих тэтгэмжийн хэмжээ нэмэгдэнэ, тухайлбал, ихэр хүүхэд төрүүлсэн даатгуулагч эхэд амаржсаны тэтгэмжийг 60 хоногоор бодож олгож байсан бол 20 хоногоор нэмэгдэж, 80 хоногийн хугацаанд олгоно, жирэмсний болон амаржсаны тэтгэмж бодох хугацаанд нийтээр тэмдэглэх баярын өдөр тохиосон бол уг өдрийг ажлын өдөртэй адилтган тооцно, хорт хавдар, сүрьеэгээр анх өвчилсөн, бөөрний хүнд хэлбэрийн дутагдал, эрхтэн шилжүүлэх мэс засал хийлгэсэн болон эрхтний донор даатгуулагчид ажлын 132 өдрийн хөдөлмөрийн чадвар түр алдсаны тэтгэмж  олгоно. Түүнчлэн хуульд ажил олгогчийг дэмжсэн зохицуулалт орсон, даатгуулагчийг тогтвор суурьшилтай ажиллуулан гурван жил дараалан ажилгүйдлийн даатгалын сангаас тэтгэмж гаргуулаагүй, хуулиар хүлээсэн үүргээ биелүүлсэн ажил олгогчийн сүүлийн жилд төлсөн ажилгүйдлийн даатгалын шимтгэлийн 15 хувиар тооцож гурван жил тутамд шимтгэлийн хөнгөлөлт үзүүлнэ.

-Одоо Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хуульд орсон гол гол шинэчлэлийн асуудлуудын талаар ярилцъя.

-Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хуулийн шинэчилсэн найруулгад үйлдвэрлэлийн осол, хурц хордлогод өртсөн, мэргэжлээс шалтгаалсан өвчний улмаас хөдөлмөрийн чадвараа алдсан даатгуулагчид эрүүл мэндийн нөхөх сэргээлтийн үйлчилгээ үзүүлж, тэднийг хөдөлмөрийн зах зээлд бэлтгэх, урьдчилан сэргийлэх арга хэмжээний зардлын үр дүнг сайжруулах, даатгуулагчид протез, ортопедийн зардлын төлбөрийг жишиг үнийг баримтлан гурван жил тутамд 100 хувиар тооцож олгох зэрэг асуудлууд тусгагдсан. Мөн ажил олгогчдыг дэмжих чиглэлээр ажил олгогч үйлдвэрлэлийн осол, мэргэжлээс шалтгаалсан өвчний даатгалын шимтгэлийг хөдөлмөрийн эрүүл ахуй, аюулгүй ажиллагааны шаардлага, эрсдэл, хөдөлмөрийн нөхцөлөөс хамааралтайгаар ажлын байраар ялгаатай төлдөг болно. Ингэснээр ажил олгогчийн төлөх шимтгэлийн хэмжээ буурна, мөн үйлдвэрлэлийн осол, мэргэжлээс шалтгаалсан өвчний даатгалын сангаас төлбөр гаргуулаагүй, хөдөлмөрийн аюулгүй байдал, эрүүл ахуйн нөхцөлийг сайжруулах, шинэ техник, технологи, инноваци нэвтрүүлэхэд хөрөнгө оруулалт хийсэн, ажлын байрны хөдөлмөрийн нөхцөлийн үнэлгээний үр дүнд үндэслэн ажлын байран дах эрсдэлийг арилгасан ажил олгогчийн сүүлийн жилд төлсөн үйлдвэрлэлийн осол, мэргэжлээс шалтгаалсан өвчний даатгалын шимтгэлийн 15 хүртэлх хувиар тооцож гурван жил тутамд шимтгэлийн хөнгөлөлт үзүүлнэ, ажил олгогч нь үйлдвэрлэлийн ослын улмаас учирсан хохирлоо арилгах, хэвийн үйл ажиллагаагаа сэргээх зорилгоор сул зогссон хугацааны үйлдвэрлэлийн осол, мэргэжлээс шалтгаалсан өвчний даатгалын шимтгэлээс чөлөөлөгдөнө.

-Нийгмийн даатгалын багц хууль 2024 оны 1 дүгээр сарын 1-нээс хэрэгжиж эхэлнэ. Нийгмийн даатгалын байгууллага бэлтгэл ажлын хүрээнд зохион байгуулж байгаа ажлын талаар ярилцъя.

-Багц хуулийн хэрэгжилтийг төв, орон нутгийн нийгмийн даатгалын байгууллага, байцаагч, ажилтнууд эрхлэн гүйцэтгэнэ. Иймээс эхний ээлжинд энэ есдүгээр сард багтаагаад нийт ажилтнуудын сургалтыг тодорхой төлөвлөгөө, хуваарийн дагуу зохион байгуулж байна. Үүний тулд Нийгмийн даатгалын ерөнхий газар дээр зургаан баг бүхий сургагч багш нарыг бэлтгэсэн. Одоогийн байдлаар Хөдөлмөр, нийгмийн хамгааллын яамны холбогдох мэргэжилтнүүд, Нийгмийн даатгалын ерөнхий газар, Нийслэлийн нийгмийн даатгалын газар, Нийгмийн даатгалын үндэсний зөвлөлийн ажлын алба, долоон аймаг, нийслэлийн дөрвөн дүүргийн нийт 522 албан хаагч, байцаагч, үүнээс сумын 110 байцаагч сургалтад хамрагдаад байна. Мөн сургалтын хөтөлбөрийн дагуу тухайн аймаг, дүүргийн ажил олгогчдод багц хуулийн шинэчлэлийн агуулга, ялангуяа ажил олгогч, даатгуулагчдад чиглэсэн шинэ зохицуулалтын талаар тодорхой мэдээлэл өгч байна. Цаашид сургалтыг МАОЭНХ, МҮЭНХ, МҮХАҮТ-тай хамтран зохион байгуулахаар төлөвлөж байна. Түүнчлэн багц хуулийг хэрэгжүүлэхтэй холбоотой УИХ-ын НББХ, Засгийн газар, Засгийн газрын гишүүд хамтран, ХНХЯ, НДҮЗ, НДЕГ-ын батлах 59 дүрэм, журам, заавар байгаа. Эдгээр дүрэм, журам, зааврын төсөл дээр ХНХЯ-ны Төрийн нарийн бичгийн даргын тушаалаар байгуулсан ажлын хэсэг ажиллаж байна. Мөн мэдээллийн технологийн чиглэлээр хуулийн өөрчлөлтүүдтэй холбоотой програм хангамжийг шинэчлэх, өөрчлөх ажлыг эхлүүлээд байна.

М.ЗУЛ