"Леонардо Малайзын сангийн асуудлаас болж Монголд ирэхээ больсон"

Холливудын нэрт жүжигчин Леонардо Ди Каприо Монголд аялна гэх мэдээлэл www.nomadicofbluesky.com сайтад энэ сарын 18-ны өдөр нийтлэгдсэн. Ер нь бол 2016 онд ийм мэдээлэл цацагдаж байсан билээ.

Монголчуудын анхаарлыг татсан эл шуугианы талаар Гадаад харилцааны сайд асан Л.Пүрэвсүрэн гаднын сайтад шинээр гарсан мэдээлэлтэй холбогдуулан дараах зүйлийг бичсэн байна.

Тэрбээр “Энэ хуучирсан мэдээлэл байх шүү! 4-5 жилийн өмнө Leo нэг хүмүүнлэгийн арга хэмжээний үеэр ийм аялал худалдаж авсан. Лео-гийн төлөөлөгчтэй аяллынх  нь бэлтгэл ажлын асуудлаар Нью-Йоркт уулзаж ярилцаж байсан. Дараа нь Лео Малайзын сангаас санхүүжилт авсан асуудал гарснаас аяллаа хийх боломжгүй боллоо гэж эргэж мэдээлж байсан. Аялалын эрхээ зарсан ч гэлүү нэг мэйл ирүүлж байсан” гэсэн байна.
 

Энд дурдагдаж буй Малайзын сантай холбоотой мэдээллийг эргэн сануулахад, 2016 оны сүүлээр Леонардо ди Каприо Малайзын  1Malaysia Development Berhad (1MDB) хөрөнгө оруулалтын сантай хамаатай асуудалд нэр холбогдсон. Түүний үүсгэн байгуулсан сан 1MBD сангаас нэг сая гаруй ам.доллар авсан. Гэтэл нөгөөх сангийн мөнгө нь АНУ-д угаагддаг гэх асуудал үүссэн байдаг.  

Леонардо Ди Каприогийн тоглосон “Wolf of Wall Street” киноны продюсер Риза Азиз Малайзын ерөнхий сайд асан Нажиб Разакийн дагавар хүү байсан юм. Түүнийг Нажиб Разакийн дэмжлэгээр Малайзын төрийн сангаас олон сая ам.доллар завшсан гэж үзэн баривчилж байсан юм. Түүнчлэн Леонардо ди Каприогийн сан 1MDB-гээс санхүүжилт авсан гэх асуудалд ч тэр холбогддог юм.