ТАНИЛЦ: Дараах шаардлагыг хангасан сургалтын төвийн үйл ажиллагааг нээнэ

Улсын Онцгой комиссын өнөөдрийн /2020.05.04/ хуралдаанаар Засгийн газрын 139 дүгээр тогтоолд өөрчлөлт оруулж, сургалтын төвүүдийн үйл ажиллагааг шат дараатайгаар нээх дээр санал нэгдлээ. Тиймээс ирэх лхагва гарагт буюу тавдугаар сарын 6-нд Засгийн газрын хуралдаанаар асуудлыг хэлэлцэж, Онцгой комиссын саналыг эцэслэн, Засгийн газрын тогтоолд өөрчлөлт оруулснаар сургалтын төвүүдийг нээх боломж нээгдэнэ. 

Гэхдээ тухайн сургалтын төвүүд дараах шаардлагыг хангасан байх ёстой юм.

• Биеийн халуун үзэх
• Амны хаалт зүүх
• Аль болох цахим сургалт хийх
• Ширээг 1-1,5 метрийн зайтай байрлуулах
• Нэг удаа 10 хүртэл хүнтэй, богино цагаар хичээллэх
• Анги танхимд спиртэн суурьтай гар ариутгагч байршуулах
• Хоёр цаг тутамд агаар сэлгэх
• Ном дэвтэр, бал, флаш зэрэг эд зүйлийг дамжуулж хэрэглэхгүй байх
• Сандал, ширээ, самбар, номын шүүгээ зэрэг хатуу гадаргууг ахуйн хэрэглээний халдваргүйжүүлэх бодисоор 2 цаг тутам цэвэрлэх
• Анги танхимд хувцас сэгсрэхгүй, өлгөхгүй байх
• Ээлж хооронд анги танхимд цэвэрлэгээ, агаар сэлгэлт хийх
• Хүн хоорондын зай барих/1-1,5 метр/
• Анги танхимд хооллохгүй байх
• Урьдчилан сэргийлэх санамж, зөвлөмжийг ил тод байршуулах
• Ариун цэврийн өрөөнд гарын саван байршуулах
• Курс дамжаа, сургалтын төвүүд тухайн мэргэжлийн онцлогт тохирсон зөвлөмж хэрэгжүүлэх

Өнөөдрийн байдлаар анхан шатны ур чадвар олгох сургалтын 414 төв, гадаад хэлний сургалтын 255 төв, жолоо болон мэргэшсэн жолооны 419 сургалтын төв үйл ажиллагаа явуулах зөвшөөрөлтэй байдаг аж. Засгийн газрын шийдвэр гарч, албажуулснаар сургалтын төвүүдийг Эрүүл мэндийн яамнаас өгсөн зөвлөмжийн дагуу шат дараатай нээх чиглэл барьж байна.