Хятад, Энэтхэг улс Ладакх дахь цэргээ нэмэгдүүлсээр байна

БНХАУ, Энэтхэг улс Ладакх дахь хилийн хяналтын бүсэд нэмэлт хүч байрлуулж байна гэж “Hindustan Times” сонин эх сурвалж дурдан мэдээлжээ.

Хятад улс Ладакх болон зэргэлдээх хил орчмын бүс нутагт 50 мянган цэрэг, танк, 150 сөнөөгч болон агаарын довтолгооноос эсэргүүцэн хамгаалах систем байрлуулжээ. Үүний хариуд Энэтхэгийн тал ижил хэмжээний нэмэлт хүчийг татсан байна. Пангонг-Цо нуур орчмын бүсэд нөхцөл байдал хурцадмал байна. Эл бүсэд Хятадын Ардын чөлөөлөх армийн 5-7 мянган цэрэг болон 20 танк төвлөрчээ. Энэ сарын 6-нд шилжих шөнө Энэтхэгийн цэргүүд өмнө нь Хятадын цэргийн хяналтад байсан тус нуурын зүүн эргийн өндөрлөг газарт байрлалаа эзэлсэн байна. Өдгөө хоёр талын цэргүүдийг 200 метр зай тусгаарлаж байна.

Энэ сарын 7-нд Хятадын ахдын чөлөөлөх армийн цэргийн командлалын баруун бүсийн төлөөлөгч Жан Шуй Ли Энэтхэгийн цэргүүд Пангонг-Цо нуур орчим хилийн хяналтын бүсийн шугамыг давж, анхааруулах гал нээсэн гэж мэдэгдэв. Жан Шуй Ли Энэтхэгийн цэргүүд хоёр талын тохиролцоог ноцтой зөрчиж, тус бүс нутаг дахь хурцадмал байдлыг улам гүнзгийрүүлсэн гэж онцолжээ. Энэтхэгийн Батлан хамгаалах яам үүнийг эсэргүүцсэн мэдэгдэл хийж, Хятадын талыг өдөөн хатгасан үйлдэл хийсэнд буруутгасан билээ.