ДОРНЫН ЗУРХАЙ: Энэ өдөр хонь жилтнээ аливаа үйлийг хийхэд эерэг сайн

Билгийн тооллын Намрын адаг Өлзийт улаан нохой сар ын 7, аргын тооллын аравдугаар сарын 23, Элдэв тэнгэртэн одтой шарагчин гахай өдөр. Өдрийн наран 07:24 цагт мандаж, 17:49 цагт жаргана.

Тухайн өдөр хонь жилтнээ аливаа үйлийг хийхэд эерэг сайн ба бар, туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлд шамдах, бүтээл туурвил эхлэх, худалдаа арилжаа хийх, бизнэс эхлэх, зэрэг дэвших, нялхсын хурим хийх, сүм дуганыг сэргээх, огторгуйн үүдийг боох, их хүмүүнтэй уулзахад сайн. Газар ухах, худаг гаргах, гөлөг тэжээх, балгадын суурь тавих, нохой худалдан авахад муу.

Өдрийн сайн цаг нь үхэр, луу, морь, хонь, нохой, гахай болой. Хол газар яваар одогсод зүүн хойш мөрөө гаргавал зохистой. Үс шинээр үргээлгэх буюу засуулахад тохиромжгүй.