Гахайн зүрх шилжүүлэн суулгуулсан өвчтөн өөд болжээ

Я.Болор | Zindaa.mn
2022 оны 03 сарын 10

Дэлхийд анх удаа генийн өөрчлөлттэй гахайн зүрх шилжүүлэн суулгуулсан өвчтөн мэс заслаас хойш хоёр сарын дараа өөд болжээ.

Мэрилэнд мужийн их сургуулийн анагаах ухааны төвийн мэдээлснээр, генийн өөрчлөлттэй гахайн зүрх шилжүүлэн суулгуулсан анхны өвчтөн гэж түүхэнд үлдсэн Дэвид Беннет 57 насандаа энэ сарын 8-ны өдөр хорвоог орхижээ. Түүний биеийн байдал хэд хоногийн өмнөөс муудаж эхэлсэн байна. Ингэхдээ эмч нар түүний үхлийн шалтгааныг тодорхой мэдээлээгүй байна. Зүрх шилжүүлэн суулгах мэс заслын дараа зүрх хэвийн ажиллаж, ондооших шинж тэмдэг ажиглагдаагүй аж.

Беннет зүрхний эдгэршгүй өвчнөөр олон жилийн турш шаналж, АНУ-ын урдаа барьдаг хэд хэдэн эмнэлгээс мэс засал хийхээс татгалзсан хариу авсан. Түүний эцсийн найдвар нь генийн өөрчлөлттэй гахайн зүрх шилжүүлэн суулгуулах мэс засал байсан билээ. Мэс заслыг энэ оны нэгдүгээр сарын 7-ны өдөр амжилттай хийж байв.

АНУ-ын засгийн газрын мэдээллээр, өдгөө тус улсад 110 мянга гаруй өвчтөн донорын эрхтэн шилжүүлэн суулгах мэс засал хийлгэхээр дарааллаа хүлээж байна. Тэднээс жилд зургаан мянга орчим нь дарааллаа хүлээж чадалгүй хорвоог орхидог байна.

Амьтны эд эрхтэн шилжүүлэх суулгах боломжийг дэлхий даяар судалдаг. Ийм төрлийн мэс засал олон мянган хүний амийг аврах боломжтой. Гэсэн хэдий ч донор амьтны эрхтэн ондооших зэрэг эрсдэл өндөр байдаг байна.

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top