Н.Эрдэнэ-Очир: Замыг нэг удаа зассанаар асуудал шийдэгдэхгүй

"Эрхэт Монгол" медиа группийн харьяа өргөн нэвтрүүлгийн "ТВ8" телевиз, Zindaa.mn сайт, "Өглөөний сонин"-ы хамтарсан баг Улаанбаатар-Дундговь-Даланзадгад чиглэлийн улсын чанартай авто замын өнөөгийн байдал, засвар үйлчилгээний талаар сурвалжилахаар яг одоо газар дээр нь ажиллаж байна.

Өнөөдөр өглөө Дундговьд очсон сурвалжлах багийнхан аймгийн Засаг даргын тамгын газрын Хөрөнгө оруулалт, хөгжлийн бодлогын төлөвлөлтийн хэлтсийн дарга Н.Эрдэнэ-Очироос нөхцөл байдлын талаар тодруулж ярилцлаа. 

Улаанбаатар-Мандалговь-Даланзадгад чиглэлийн улсын чанартай авто замаар Тавантолгой түлш, Мааньт чиглэлийн экспортын нүүрс тээвэрлэж байгаа нь замын гэмтэл, эвдрэл үүсэх нөхцөлийг бий болгоод байгаа юм.

Баримтаас харахад, Улаанбаатараас-Мандалговь хүртэлх 5283.49 м.кв, Мандалговиос Даланзадгад хүртэл 3230 м.кв авто зам эвдэрч, сүйдсэн байгаа аж. 

Хөрөнгө оруулалт, хөгжлийн бодлогын төлөвлөлтийн хэлтсийн дарга Н.Эрдэнэ-Очир "Дундговийн авто замын компаниудаас гаргаж өгсөн дээрх эвдрэл гэмтлийн тоон баримт өдөр ирэх тусам нэмэгдэж байна. Гэхдээ энэ асуудал зөвхөн нэг удаагийн мөнгөн хөрөнгөөр засагдаж, цаашид бат бөх байна гэх баталгаа байхгүй. Учир нь Монгол Улсад уул уурхайн хүнд тээвэр явах зориулалтын зам алга. Тиймээс замыг нэг удаад засч, янзлаад орхих биш шинээр уул уурхайн хүнд тээвэрт зориулсан зам тавих ёстой. Түүнчлэн зам засварын тендерийн компанийг шалгаруулахдаа маш нухацтай, хариуцлагатай хандах асуудлыг ч ярих нь зүй" хэмээлээ. 
 

 ДЭЛГЭРЭНГҮЙ ЯРИЛЦЛАГЫГ ВИДЕО ХЭЛБЭРЭЭР ҮЗНЭ ҮҮ!