КОВИД-19: Эрээн хотод ХӨЛ ХОРИО тогтоожээ

БНХАУ-ын Эрээн хотод коронавирусний дөрвөн тохиолдол илэрсэн тул өнөөдрөөс /2022.06.02/ хөл хорио тогтоосон байна.

Хөл хорио хэдэн өдөр үргэлжлэх нь тодорхойгүй байгаа бөгөөд одоогоор хүн нэг бүрээс шинжилгээ авч эхлээд байгаа аж. 

Монгол Улсын Гадаад харилцааны яамнаас "Эрээний гаалийн байгууллага хэвийн ажиллаж байгаа" гэх мэдээллийг өглөө. Мэдээлэлдээ "Эрээн хотын Цар тахлаас урьдчилан сэргийлэх, хянах шуурхай штабаас 2022/01 тоот мэдэгдэл гаргаж 2022 оны 6 дугаар сарын 2-ны өдөр ПСР шинжилгээгээр covid-19-ын 4 тохиолдол илэрч, хатуу хөл хорины дэглэм тогтоох шийдвэр гаргав. Үүнд, сургууль, цэцэрлэг болон бусад нийтийн газрын үйл ажиллагаа, авто, төмөр, агаарын замын нийтийн тээврийн үйлчилгээг түр хугацаагаар зогсоож, иргэдийг гэрээс гарахгүй, үйлчилгээг хаалганаасаа авах, цар тахлын дэглэмийг нягт баримтлах, шаардлагатай тохиолдолд шуурхай штабаас зөвшөөрөл авч хотоос гарах зэрэг дэглэм баримтлахаар болсон байна. Мөн тус өдрийн өглөөний 07 цагаас эхлэн хотын нийт иргэдээс ПСР шинжилгээ авч эхэлсэн бөгөөд орон сууцны хорооллуудад пост гаргаж, хяналт тавих, бүртгэл хийх ажил явагдаж байна. Зарим иргэд хүнсээ бэлдэж эхэлсэн байдалтай байна. Одоогоор Эрээн- Замын-Үүд боомтын үйл ажиллагаа хэвийн явагдаж байна" гэлээ.