Энэ зун Путины маршрутаар амарч болно

ОХУ-ын Ерөнхийлөгч Владимир Путин сүүлийн арваад жил Тувагийн тайгад амарч байгаа. Батлан хамгаалахын сайд Шойгугаа дагуулаад заримдаа өвөл, заримдаа намар, зун ирнэ.

Голд сэлж, загасчлан, мөөг, жимс түүдэг. 15 жилийн өмнө Путин Монакогийн хан хүү Альберыг амрахдаа дагуулж явснаар энэ газар дэлхийд алдаршсан юм.

Оросын аялал жуулчлалын Ростуризм компаниас Путины маршрутаар амрах шинэ брэнд гаргасан нь энэ сараас аялагчдаар дүүрэн байгаа гэнэ. Тувагийн нийслэл Кызылээс Чаа-Холь тосгон хүртэл 200 км засмал замаар явна. Эндээсээ хойд зүгт хээрийн замаар 30 км явж, Сарыг-Хол Аксы ууланд хүрнэ. Жолоочтой микро 10 мянган рублийн өртөгтэй. Амраад уулнаасаа бууж, Енисей мөрний эрэг хүртэл аялна. Эргээ дагаад Хомужак Аксы хөндийд очих юм. Завь хөлслөхөд 20 мянган рубль.

Зарим газарт машин явах боломжгүй тул мориор л хүрч чадна. Морь хөлслөхөд 16 мянган рубль, загасчлах эрх 5000 рубль. Хэчнээн улсын Ерөнхийлөгч ч эзгүй газар гэрт хоноглоно. 4 ортой гэртэй бөгөөд нэг ор 2,5 мянган рубль. Нийт долоо хоног амрахад хүний 83 мянган рубль (хоол тусдаа) болох гэнэ.

Ингээд л та В.Путин шиг амарч чадах юм.