RT: Лавровыг Монголд уламжлал ёсоор ааруултай угтав

ОХУ-ын Гадаад хэргийн сайд Сергей Лавров Монгол Улсад ажлын айлчлал хийж байна.

Түүний айлчлалын талаар ОХУ-ын хэвлэл мэдээллийн хэрэгслүүд мэдээлж эхэллээ.

Тухайлбал, RT агентлаг “Гадаад хэргийн сайд Сергей Лавровыг өнөөдөр өглөө /2022.07.05/ Улаанбаатар хотын нисэх буудалд буухад нь уламжлал ёсоор ааруултай угтлаа. Сергей Лавров айлчлалын хүрээнд Монгол Улсын Гадаад харилцааны сайд Б.Батцэцэгтэй хэлэлцээ хийнэ. Мөн Монгол Улсын Ерөнхийлөгч У.Хүрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэ нарт бараалхана” гэж мэдээллээ.

Тэгвэл РИА Новости агентлаг “Гадаад хэргийн сайдыг үндэсний хувцастай охид угтан авч, монгол амттангаар дайлав. Сергей Лавров өнөөдөр Монголын Гадаад хэргийн сайд Б.Батцэцэгтэй хэлэлцээ хийнэ. Хоёр талын хэлэлцэх гол асуудлууд нь худалдаа, эдийн засаг, зам тээвэр, дэд бүтэц, эрчим хүч, хүмүүнлэгийн салбарын хамтын ажиллагааг хөгжүүлэх төлөвлөгөөний хэрэгжилт байх болно” гэж мэдээлсэн байлаа.

Оросын хэвлэл мэдээллийн хэрэгслүүд хоёр улс 2020 оны гуравдугаар сарын 10-нд зогсоосон байсан төмөр замын харилцаагаа өнгөрсөн дөрөвдүгээр сард сэргээснийг онцолжээ. Коронавирусний халдварын тархалтын улмаас зогссон байсан төмөр замын харилцаа сэргэж, эхлээд Эрхүү, Улаанбаатар чиглэлд иргэд төмөр замаар зорчиж эхэлсэн юм.

Б.Батцэцэг, Сергей Лавров нарын уулзалтын үеэр Монгол, Оросын иж бүрэн стратегийн түншлэлийн харилцааг бодит агуулгаар баяжуулах төслүүдийг урагшлуулах, Монгол Улсын эдийн засгийн чухал ач холбогдолтой зарим асуудлыг хэлэлцэхээр төлөвлөжээ.

Тухайлбал, Монгол, Оросын хилийн шалган нэвтрүүлэх боомтуудыг шинэчлэн өргөтгөх, “Алтанбулаг”, “Цагааннуур” чөлөөт бүсүүдэд Оросын талаас хөрөнгө оруулалт хийн, хамтарсан үйл ажиллагаа эрхлэх, газрын тосны бүтээгдэхүүний найдвартай нийлүүлэлтийг хангах, эрчим хүч, соёл, боловсролын салбарт хамтран ажиллах зэрэг асуудлаар ярилцах аж.