Их Британи Монголын төлөө Орос банкнуудын хоригийг сулруулав

Их Британийн засгийн газраас Монголд нийлүүлэх эрчим хүчний тээвэрлэлт, нийлүүлэлтийн зардлыг хоригт ороод байсан орос банкнуудаар дамжуулан төлж болно гэсэн зөвшөөрөл гаргажээ. Үүнд Украины дайнаас хойш хатуу хоригт орсон ОХУ-ын Сбербанк, Газпромбанк, Московский кредитный банк (МКБ), Росбанк багтжээ.

Энэ зөвшөөрөл энэ оны наймдугаар сарын 15-наас 2023 оны наймдугаар сарын 14 хүртэл үргэлжлэх юм. Мөн дээрх банкнуудын охин компани, салбарууд ч Монголын эрчим хүчний төлбөрт оролцож болох юм байна.

Украинд дайн эхэлснээс хойш Их Британийн хоригт ОХУ-ын Сбербанк, Альфа-банк, ВТБ, банк ФК Открытие, Россельхозбанк, Газпромбанк, МКБ, Промсвязьбанк, Совкомбанк, банк Россия, СМП-банк, Московский индустриальный банк орсон билээ. Өнгөрсөн долоодугаар сард Их Британи ОХУ-аас нефть, нүүрс импортлохыг хориглосон юм.