“Coal Mongolia": Хаягдал нүүрс эдийн засгийн эргэлтэд орсноор татварын бааз суурь тэлнэ

Нүүрсний салбарын худалдаа, хөрөнгө оруулалтын олон улсын “Coal Mongolia-2022” чуулга уулзалт, үзэсгэлэн хоёр дахь өдрөө үргэлжлэн зохион байгуулагдаж байна.

Ковид цар тахлын улмаас сүүлийн хоёр жил өнжөөд байсан “Coal Mongolia" чуулга уулзалтаар энэ жил яригдаж буй онцлох сэдвүүдийн нэг нь дотоодын экспортлогч компаниудад тулгамдсан экспортын бүтээгдэхүүний жишиг үнэ тойрсон асуудал юм. Уг сэдвээр нээлттэй хэлэлцүүлэг өрнөлөө.

УУХҮЯ-ны зүгээс нүүрсний ангиллыг нэмэгдүүлсэнээр нүүрсний экспортын жишиг үнийг бодитой тогтоох, аж ахуйн нэгжүүдийн үйл ажиллагаа бизнесийн бодит нөхцөлд нийцэж, санхүүгийн дарамтад орохгүй байх, Монгол Улсын экспортын нүүрсний нэр төрөл олширч, төсөвт төвлөрүүлэх татварын нийт хэмжээ өсөх зэрэг олон талын ач холбогдолтойг дэд сайд О.Батнайрамдал онцолсон.

Экспортын бүтээгдэхүүний жишиг үнийг илүү бодитой тогтоох асуудал өнгөрсөн хугацаанд хурцаар тавигдаж ирсэн юм. Тэгвэл УУХҮЯ, Сангийн яам, АМГТГ болон аж ахуйн нэгжүүдийн хамтын ажиллагааны үр дүнд нүүрсний ангиллыг шинэчлэн баталж, нүүрсний үнэ болон чанар хоорондын хамаарлыг илүү нарийвчилсан.

Энэхүү өөрчлөлтийн үр дүнд доод ангиллын нүүрсэнд өндөр татвар ногдуулж, улмаар олборлолт явуулах нь эдийн засгийн хувьд үр ашиггүй болгодог байдал зогсох, улмаар хаягдал нүүрс эдийн засгийн эргэлтэд орсноор татварын бааз суурь тэлэх нөхцөл бүрджээ.

Нүүрсний 11 ангилалтай байсныг 29 болгож, олон улсын жишигт нийцүүлсэн уг шийдвэр энэ сараас хэрэгжиж эхлэх юм. Нүүрсний экспортын жишиг үнийг бодитой тогтоосноор аж ахуйн нэгжүүдийн үйл ажиллагаа бизнесийн бодит нөхцөлд нийцэж, санхүүгийн дарамтад орохгүй байх, цаашилбал Монгол Улсын экспортын нүүрсний нэр төрөл олширч, төсөвт төвлөрүүлэх татварын нийт хэмжээ өсөх зэрэг олон талын ач холбогдолтой гэж салбарынхан үзэж байна.