Киевт нийлүүлсэн зэвсгийн техник үйлчилгээний асуудлыг хэлэлцэж байна

Герман улс Украинд нийлүүлсэн зэвсэглэлийг засварлах техник үйлчилгээний төв байгуулах асуудлыг Польшийн талтай хэлэлцэж байна гэж Германы Батлан хамгаалахын сайд Кристина Ламбрехт мэдэгджээ.

Түүний хэлснээр, тус төвийг Польшийн зүүн хэсэгт байгуулах асуудал хүчтэй яригдаж байна. Ингэснээр шаардлагатай үед Киевийн ашиглаж буй зэвсэг, техник, тэр дундаа гаубиц их бууг шуурхай засварлах боломжтой болно. Түүнчлэн, Ламбрехт Европын Холбооны хүрээнд зэвсэг хөгжүүлэх хамтарсан төслийг дэмжиж буйгаа илэрхийлээд энэ төрлийн зэвсгийг гуравдагч орнуудад худалдахыг хориглох шаардлагагүй гэж үзэж байна.

Үүнээс өмнө Бундестаг /парламент/ дээр үг хэлэхдээ Ламбрехт тус улс Киевт их хэмжээний зэвсэг нийлүүлж, хязгаарт тулсан гэж мэдэгдэж байжээ.