Хоёр хүүхэдтэй, жирэмсэн эхнэртэй эрчүүдийг дайчилгаанаас ЧӨЛӨӨЛӨХ ҮҮ?

ОХУ-д хоёр хүүхэдтэй, эхнэр нь жирэмсэн буюу гурав дахь хүүхэд нь төрөх гэж буй эрчүүдийг цэргийн хэсэгчилсэн дайчилгаанаас чөлөөлсөн талаар Төрийн Думын Гэр бүл, эмэгтэйчүүд, хүүхдүүдийн асуудал эрхэлсэн хорооны дарга Нина Останина мэдэгджээ.

Нина Останинагийн ярьснаар мөн хөгжлийн бэрхшээлтэй хүүхэдтэй аавуудыг дайчилгаанаас чөлөөлөх аж. Тэднийг хэдэн хүүхэдтэйгээс нь үл хамааран дайчилгаанаас чөлөөлөх юм байна.

Тэгвэл ОХУ-ын Батлан хамгаалах яамнаас дээрх мэдээллийг албан ёсоор батлан мэдээлээгүй байна.

Нина Останина “Батлан ​​хамгаалахын дэд сайд Николай Панковтой утсаар ярилаа. Эхнэр нь 22 долоо хоногтой жирэмсэн хоёр хүүхдийн аавыг дайчилгаанаас чөлөөлөх тухай Жанжин штабын удирдамжид оруулсан бидний өөрчлөлтийг хүлээж авлаа” гэж Телеграмдаа бичжээ.

Түүний хэлснээр уг зааварт өөр нэг нэмэлт өөрчлөлт оруулсан нь хөгжлийн бэрхшээлтэй хүүхдийн эцгийг хүүхдийн тооноос нь үл хамааран хэсэгчилсэн дайчилгаанаас чөлөөлөх аж.

Нина Останина “Бид энэ асуудлыг хамт олонтойгоо тусад нь хэлэлцэх болно. Гэхдээ Төрийн Думын Батлан ​​хамгаалах хорооны дарга бидний нэмэлт, өөрчлөлтийг биечлэн дэмжинэ гэж амласан” гэжээ.