Хүүгээ ажилд оруулахын тулд элгээ зарсан эмэгтэйг ТОРГОЖЭЭ

Өмнөд Солонгост нэртэй компанид ажилд орох нь тийм ч амар зүйл биш. Ажил хайж буй залуусын эцэг8 эхчүүд хүүхдээ ажилд оруулахын тулд багагүй хүчин чармайлт гаргадаг бөгөөд хүүгээ ажилд оруулахын тулд элэгээ зарахыг завдсан эмэгтэйн хэрэг шуугиан тариад байна. 

Энэ оны хоёрдугаар сард 50 настай эмэгтэй К барилгын компанид ажилладаг Н-тэй уулзснаар элэгний донор хайж буй захирлынх нь талаар олж мэджээ. Н нь захирлын хүүтэй хамт ажилладаг нэгэн байсан бөгөөд тус компанийн захирлын элэгний донор болохыг зөвшөөрсөн байна. 

Үүнийхээ хариуд 100 сая вон авах, хүүгээ ажилд оруулах гэсэн тохиролцоо хийсэн эмэгтэй өөрийгөө "Захирлын бэр" хэмээн танилцуулж, эмнэлэгт донорын шинжилгээ өгчээ.

Долоо хоногийн дараа түүнийг "Донор болгох боломжтой" гэсэн хариу гарсан байна. 

Хагалгаа болохоос өмнө эмэгтэй Ковидын халдвар авсан учраас мэс заслын тов хойшилжээ. Энэ хугацаанд сувилагч донор болохоор ирсэн бүсгүй болон түүний асран хамгаалагч нар сэжигтэй байгааг анзаарч, тэднийг эрхтний наймаа хийж байж болзошгүй тухай цагдаад мэдээлжээ. 

Мэдээллийн дагуу мөрдөн байцаалтын ажиллагаа эхлүүлснээр уг хэрэг ил болжээ. Тус улсын Эрхтэн шилжүүлэн суулгах тухай хуульд эд эрхтнийг ямарваа нэгэн бараа, эд зүйлийн оронд худалдахыг хатуу хориглодог аж. 

Сөүл хотын төв шүүхээс К-д 3 сая вонын торгууль ногдуулсан бол компанийн ажилтан Н-д гэмт хэрэг зохион байгуулсан гэх үндэслэлээр 6 сарын хорих ял оноожээ. Элэг шилжүүлэн суулгах хагалгаа хүлээж байсан захирал өнгөрөгч долоодугаар сард буюу мөрдөн байцаалт явагдаж байх үед нас барсан байна.