Б.Ганхуяг: Надад шанага ч нүүрсний асуудал байхгүй

Нүүрсний хулгайн хэрэгт нэр холбогдож, яллагдагчаар татагдсан Хөдөлмөр, нийгмийн хамгааллын сайд асан Т.Аюурсайхан, "Эрдэнэс тавантолгой" ХК-ийн Гүйцэтгэх захирал асан Б.Ганхуяг нарын 11 хүнд холбогдох хэргийн шүүх хурлын урьдчилсан хэлэлцүүлэг 13.30 цаг хүртэл түр хойшиллоо. 

Шүүх хурлын урьдчилсан хэлэлцүүлгийн үеэр "Эрдэнэс тавантолгой" ХК-ийн Гүйцэтгэх захирал асан Б.Ганхуяг "Энэ хэрэг дотор надтай холбоотой  зургаан үйлдэл бий. Нэг шанага ч нүүрсний асуудал байхгүй. Анх 2023 оны хоёрдугаар сарын 8-ний өдөр цагдан хорьсон. Намайг жагсаал цуглаан зохион байгуулсан, санхүүжүүлсэн гэх үндэслэлээр цагдан хорьсон. Есөн сарын дотор нэг ч мэдүүлэг аваагүй, нэг ч үг асуугаагүй Дараа нь нүүрсний хэрэг гэж гарч ирсэн, нүүрстэй холбоотой 50-60 хэрэг мэдүүлэг авсан, тэр дотор нэгийг нь үйлдээгүй. Одоо нийгэмд яваад байгаа УИХ-д Ажлын хэсэг байгуулсан байна. Байнга нүүрс ярьж байна, надтай холбоотой нэг ч асуудал байхгүй" гэлээ.