ИТЭВОН | Хохирогчдын ар гэрийнхэн ослын тухай хууль батлахыг шаардав

2022 оны аравдугаар сарын 29-ний өдөр Өмнөд Солонгосын Итэвон хороололд 159 хүн нэг дор амиа алдсан эмгэнэлт явдал гарсан. Уг явдлаас хойш нэг жилийн хугцааа өнгөрч, хохирогчдийн ар гэрийнхэн гамшгийн эсрэг хариу арга хэмжээ авч, хохирлоо барагдуулахын тулд тэмцсээр байна. 

Эмгэнэлт явдал болсон өдөр Итэвонд 100.000 орчим хүн цугларчээ. Хохирогчид 3.2 метрийн өргөнтэй уруу замд хэт олноороо бөөгнөрснөөс үүдэн осолдсон бөгөөд энэхүү осол 2014 онд болсон Севол гатлага онгоцны ослоос хойш тус улсад гарсан хамгийн том осол байв. Севол гатлага онгоцны ослоос 304 хүн амь үрэгджээ. 

Итэвоны ослоор амиа алдсан хүмүүсийн дурсгалд зориулсан гашуудлын тахилын ширээ Сөүл хотын захиргааны урд байрлах нийтийн талбайн буланд байршжээ. Хохирогчдын ар гэрийнхэн ослын талаар тусгай хууль батлахыг уриалан эрх баригчдад шаардлага хүргүүлжээ. 

Осол болсны дараа Ёнсан тойргийн оффисын дарга Пак Хи Ён, Ёнсан цагдаагийн газрын дарга асан М Им Жэ зэрэг анхны тусламж үзүүлэх арга хэмжээ авах ёстой байсан хүмүүс хэрэгт яллагдагчаар татагдсан. Эдгээр хүмүүст холбогдох шүүх хурал үргэлжилсээр байгаа бөгөөд хохирогчдийн ар гэрийнхэн хэргийг үнэн зөвөөр шийдвэрлэхийг шаардсаар байна. 

Эмгэнэлт явдал болсон шөнө яаралтай тусламж хүссэн 87 дуудлага иржээ. Гэсэн ч үүнийг үл тоон, гамшгаас урьдчилан сэргийлэх ямар ч арга хэмжээ аваагүй нь осол болоход гол нөлөө үзүүлсэн хэмээн хохирогчдийн ар гэрийнхэн үзэж байгаа аж. 

Осол гарснаас хоёр БНСУ олон нийтийн арга хэмжээний үеэр аюул ослоос урьдчилан сэргийлэхийн тулд авах арга хэмжээгээ чангатгасан. 2027 он гэхэд  улсын хэмжээнд бүх бүс нутгийн засгийн газрууд гамшгийн үеийн нөхцөл байдлын өрөөг 24/7 ажиллуулж, хяналтын камеруудаа хиймэл оюун ухаантай, олныг хянах чадвартай камераар солихоор шийдвэрлэжээ. 

Ирэх долоо хоногт эмгэнэлт явдлаас хойшхи нэг жилийн ой тохиож байгаа тул тус улсын зочид буудал, зугаа цэнгэлийн парк, хямдралтай дэлгүүрүүд энэ жил Halloween-ийн сурталчилгаанаас татгалзахаар шийджээ. Хэллоуин тэмдэглэхээр төлөвлөж буй хүмүүс Итэвоноос татгалзаж Хонгик их сургуулийн ойролцоох өөр алдартай шөнийн цэнгээний газар баярлахаар төлөвлөжээ. 

Ирэх ням гаригийн ойн өдөр ар гэрийнхэн нь эмгэнэлт явдлыг тэмдэглэхээр төлөвлөж байгаа бөгөөд Сөүл хотын төвд Итэвоноос Сөүл хотын захиргаа хүртэл жагсаал хийж, орой нь олон нийтийн жагсаал зохион байгуулахаар төлөвлөж байгаа ажээ.