Шашны гаж урсгалын удирдагчид бэлгийн хүчирхийллийн хэргээр 30 жилийн ЯЛ ОНООНО

Энэ долоо хоногийн мягмар гарагт БНСУ-ын прокурорууд бэлгийн хүчирхийллийн хэрэг үйлдсэн хэргээр шалгагдаж буй шашны бүлгийн удирдагчид 30 жилийн хорих ял оноохыг шаарджээ. 

Jesus Morning Star хэмээх шашны тэргүүн Жон Мён Сог нь 2018 оны хоёрдугаар сараас 2021 оны есдүгээр сар хүртэл гадаадын харьяат хоёр итгэгч эмэгтэйд удаа дараа бэлгийн хүчирхийлэл үйлдсэн, Өмнөд Солонгосын итгэгч эмэгтэйд бэлгийн дарамт учруулсан хэрэгт буруутгагдаж байгаа аж. 

Тэжон дүүргийн шүүхэд болсон эцсийн хэлэлцүүлэгт прокурорууд түүнийг 500 цагийн бэлгийн хүчрхийллийн эсрэг хөтөлбөрт хамрагдаж, 20 жилийн турш шагайдаа хяналтын аппарат зүүхийг шаардсан байна.
Өөрийгөө Мессиа буюу Есүсийн хоёр дахь дүр хэмээн нэрлэдэг Жон хэд хэдэн итгэгч эмэгтэйг хүчирхийлж, JMS-ээс мөнгө завшсан хэргээр 10 жил шоронд хоригдсоны эцэст 2018 онд суллагдсан. Түүнийг суллагдсаны дараа шашны удирдагчийн бэлгийн хүчирхийлэлд өртсөн гэх хэд хэдэн хэрэг ил болсон бөгөөд Жон болон бусад гурван шашны удирдагчийн үйлдсэн гэмт хэргийн тухай өгүүлсэн баримтат кинон "Netflix"-ээр цацагджээ.