Сэтгүүлчийг эрүүдэн шүүсэн мөрдөгчийг АТГ-т шалгаж байна

Сэтгүүлчийг эрүүдэн шүүсэн, эрүүл мэндийг нь хохироож сэтгэл санаа, бие мах бодид ноцтой хохирол зориуд учруулсан, улмаар амьдралд нь том гарз хохирол учруулахуйц нөхцөл байдалд түлхсэн байж болзошгүй хэргээр Мөрдөн байцаах албаны Хүний эрүүл мэндийн халдашгүй байдлын эсрэг гэмт хэрэг мөрдөн шалгах хэлтсийн ахлах мөрдөгч, цагдаагийн хошууч Ц.Батцэнгэл АТГ-т шалгагдаж байна.

Энэ талаар албаны эх сурвалжаас тодруулахад, Ц.Батцэнгэлийг бусдыг эрүүдэн шүүсэн гэх хэрэгт холбогдуулан өнгөрсөн сараас эхлэн шалгаж байгаа бөгөөд тэрбээр сэтгүүлчийг эрүүдэн шүүсний улмаас эрүүл мэндийн байдал нь эрс дордож, эмнэлэгт хэвтэн эмчлүүлж байгаа гэдэг мэдээлэл байна.

Уг этгээд нь удаа дараагийн үйлдлээр хэд хэдэн хүнийг гэмт хэрэгт хилсээр гүтгэж, эрүүдэн шүүсэн байж болзошгүй гэдэг мэдээллийн мөрөөр эрүү шүүлтэд өртсөн гэх сэтгүүлчээс мөн тодрууллаа. 

Тэрбээр “Нууцын баталгаанд гарын үсэг зурсан тул хэргийн талаар ярих боломжгүй байна. Сонгууль дөхсөнтэй холбоотойгоор захиалгаар баримт устгах ажиллагаа явж байна гэж хардаж байгаа" гэлээ. 

Хэрвээ Ц.Батцэнгэлийг бусдыг эрүүдэн шүүсэн болох нь тогтоогдвол Эрүүгийн хуулийн 21.12 дугаар зүйл.Эрүү шүүлт тулгах гэсэн зүйл ангиар ял оноох юм. Уг заалтад “ 1.Төрийн албан хаагч тайлбар, мэдүүлэг авах, хэрэг хүлээлгэх, ял, шийтгэл оногдуулах, ялгаварлах зорилгоор өөрөө, эсхүл бусад этгээдийг хатгаж, зөвшөөрөл олгож, эсхүл бусад байдлаар тухайн үйлдлийг хийхийг зөвшөөрч байгаагаа илэрхийлж бусдын бие махбод, сэтгэл санааг шаналган зовоосон бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар хорих ял шийтгэнэ” гэж заажээ.