ХЭН ЮУ ХЭЛЭВ I Шахалт дарамт, айдас хүйдэс дор цэргийн албыг хааж байна

Энэ удаагийн "ХЭН ЮУ ХЭЛЭВ" буландаа Батлан хамгаалахын сайд С.Бямбацогт, УИХ-ын гишүүн П.Сайнзориг, Монгол Улсын Ерөнхийлөгчийн Гадаад бодлогын зөвлөх Э.Одбаяр нарын хэлсэн үгээс онцолж байна.

Батлан хамгаалахын сайд С.БЯМБАЦОГТ: Манай улсад цэргийн алба хаах насны 240 мянга орчим хүн бий. Үүнээс 4-5 орчим хувь нь цэргийн албыг биеэр хаадаг. Энэ хүмүүс шахалт дарамт, айдас хүйдэс дор цэргийн албыг хааж байгаа. Хугацаат цэргийн алба хаах хүсэл сонирхлыг нэмэгдүүлэх, хүүхэд залуучуудад эх оронч үзлийг түгээн дэлгэрүүлэх үүднээс "Эх орны дуудлага эр цэргийн алба" зорилтыг дэвшүүлсэн. Энэ зорилтыг хэрэгжүүлэхээр хугацаат цэргийн алба хаагчдын сургалтын хөтөлбөрийг шинэчилнэ. Тиймээс англи хэл, жолооны, мэдээллийн технологи, эрэлттэй мэргэжлийн сургалтыг нэмэх юм. Оюутан цэрэг хөтөлбөр ихээхэн нэр хүндтэй байгаа. Нэг жилд 10,000 орчим хүн хүсэлт ирүүлдгээс 1000 гаруй нь оюутан цэрэгт явдаг. Зэвсэгт хүчний нэр хүндийг нийгэм, ард иргэдэд өндөр болгох, цэргийн алба хаагчид энэ салбарт ажиллаж байгаагаараа бахархдаг байх шаардлагатай.

УИХ-ын гишүүн П.САЙНЗОРИГ: Х.Баттулга нь аймаг, нийслэлийн сонгуулийг угтаж “Хүүхэд багачуудад 30 мянган төгрөгийн хүнсний талон тараана” гэсэн нь дахиад л цэвэр популист амлалт төдийгүй сонгуулиар бэлэн мөнгө амлах нь илтэд хууль зөрчсөн үйлдэл, түүний энэ давралт хаана хүрээд зогсох вэ. Хэн хэлэх вэ. Тийм учраас Монгол Улсын Ерөнхийлөгчөөр хүртэл ажиллаж байсан Х.Баттулга та энэ бэлэн мөнгө амладаг хууль бус үйлдлүүдээ зогсоо. Улс төрийн сонгууль угтаж ард иргэдийг ингэж хуурдгаа боль. Та энэ улс оронд маш олон өндөр албан тушаал хашлаа. Жишээ нь, Ерөнхийлөгч, ХХААҮ-ийн сайд, Зам тээврийн сайд, УИХ-ын гишүүн зэрэг олон албан тушаал хашсан хүн. Таны гаргаж байсан шийдвэрүүд дандаа хууль зөрчсөн, улс орны эдийн засагт тушаа болж байсан.
 

Ерөнхийлөгчийн Гадаад бодлогын зөвлөх Э.ОДБАЯР: Олон улсын манай улсад хандаж байгаа хандлага яг хэвээрээ. Ямар ч өөрчлөлт байхгүй. ОХУ-ын Ерөнхийлөгч В.Путины айлчлалын талаар ярьж байгаа хүн энд алга. Манай улсын Ерөнхийлөгчтэй уулзах хүсэлт тавиад уулзалтынхаа үеэр мөнхийн хөрш ОХУ-ын Ерөнхийлөгчийг Монгол Улс хүлээн авсантай холбоотойгоор ингэлээ, тэглээ гэх агуулгатай ямар ч уулзалт болоогүй. Энд тэрнээс илүү том сэдэв яригдаж байна.

Энхийн төлөө эв санаагаа нэгтгэж, эв санаагаа нэгтгэж, хөгжлийн хөтөлбөрүүдээ яаж хэрэгжүүлэх юм гэдэг асуудал дээр хоорондоо ярилцаж, хэлэлцэж байна. НҮБ-ын Ерөнхий Ассамблейн 79-р чуулганы үеэр манай улсад үл итгэсэн, үл тоосон, ямар нэг байдлаар шахалтад оруулсан зүйл гараагүй. Харин ч улс орнуудын зүгээс хоёр талын уулзалт хийх хүсэлтийг олноор ирүүлсэн. Энэ жил манай талтай уулзах хүсэлт дийлэнх байгаа тул бид өөрсдийн төлөвлөсөн уулзалтуудаа хийх цаг зав хүрэлцэхгүй байх асуудал гарч байна.