Оросын газрын тос, байгалийн хийн төслүүдээс гарах бодолгүй байна

Японы Засгийн газар тус улсын эрчим хүчний аюулгүй байдалд чухал нөлөөтэй Оросын газрын тос, байгалийн хий олборлолтын "Сахалин-1" ба "Сахалин-2", төслүүд дэх оролцоогоо хэвээр хадгалахаар төлөвлөж байгаа хэдий ч эрчим хүчний салбарт ОХУ-ын нөлөөнөөс аажмаар ангижрах бодлого явуулж байгаа тухай Японы гадаад харилцааны яамнаас жил бүр гаргадаг илтгэлд өгүүлжээ.

“Газрын тос, байгалийн хийн олборлолтын "Сахалин-1" ба "Сахалин-2", төслүүд нь дунд болон урт хугацаанд тогтвортой нийлүүлэлтийг хангах үүднээс Японы эрчим хүчний аюулгүй байдалд чухал нөлөөтэй учраас бид эдгээр төсөлд оролцсон хэвээр байна. Эрчим хүчний салбарын хувьд Японы засгийн газар Оросын нүүрс болон газрын тосноос хараат байдлаа аажмаар арилгах бодлого явуулж байна” гэж уг илтгэлд тэмдэглэсэн байна.

Дэлхийн байгалийн хий томоохон импортлогчдын нэг болох Япон улс гадаадаас авдаг байгалийн хийн 9%-ийг "Сахалин-2" төслийн хүрээнд худалдан авдаг аж. Японы Мицүй болон Мицүбиши компани энэ төслийн 12,5% болон 10%-ийг тус тус эзэмшдэг юм байна.

"Сахалин-1" төслийн 30%-ийг Японы Sodeco консорциум эзэмшдэг ажээ. Япон улс одоо энэ төслийн хүрээнд газрын тос импортлохгүй байгаа хэдий ч нийлүүлэлтийг төрөлжүүлэх үүднээс энэ төсөл чухал хэмээн үзэж байна. Япон улс газрын тосны хэрэгцээнийхээ 95%-ийг Ойрх Дорнодоос хангадаг аж.