Вампируудыг устгах Британийн зэвсгийн цуглуулга

Британийн Tennants Auctioneers дуудлага худалдааны төвд “Дракула” романы гол дүр доктор Ван Хельсингийн шүтэн бишрэгчдэд зориулсан XIX зууны үеийн вампируудыг устгах иж бүрэн зэвсгийн цуглуулгыг худалдаалахаар тавих гэж байна.

Виктория хатан хааны үеийн улаан модон хайрцганд гар буу, модон гадас, алх, ариун устай лонх, шившлэгтэй шороо, сармисны нухаш зэргийг хийжээ. Мөн Евангели судраас хэсэгчлэн авсан тарнийн ном вампирын ангуучдад маш их хүчийг өгдөг гэж үздэг аж.

Энэхүү цуглуулга нь Йоркширийн нэгэн оршин суугч эмэгтэйд удам дамжин өвлөгдөж ирсэн ажээ.

Дуудлага худалдаанд энэ сарын 22-нд тавигдах ба анхны үнэ нь 2000 фунт буюу 3000 доллараас дуудагдах аж.

Д.Мигаа